Në orët e fundit te Vllaznia po qarkullon më shumë se kurrë lajmi se Aron Jukaj është pranë largimit nga skuadra. Gardiani 20-vjeçar i shkodranëve ka një ofertë nga Arabia Saudite, që duket se është konkrete dhe tundon klubin kuqeblu, por edhe vetë portierin. Ku në ditët e ardhshme pritet të ketë një vendim përfundimtar, nëse Jukaj do vijojë me 9 herë kampionët e vendit tonë apo do të vijojë karrierën jashtë vendit. Për këtë arsye te Vllaznia janë vënë menjëherë në lëvizje për të gjetur një tjetër portier dhe sipas asaj çfarë mëson gazeta në burime pranë klubit, emri më i lakuar është ai i Kristi Qarrit.
Shkodrani e nisi këtë edicion me aktivizimin në “Conference League” ndaj Daugavpils, por me ardhjen e Leon Pohls u duk se u largua nga skuadra. Pasi që nga ai moment 24-vjeçari nuk ka qenë më pjesë e ekipit, madje as duke mos u stërvitur me kuqeblutë. Megjithatë kontrata e tij nuk është shkëputur ende nga ana e drejtuesve të klubit, të cilët i kanë dhënë një opsion rikthimi Qarrit. Në rast se ky i fundit ndryshon mendjen dhe kërkon të qëndrojë në Shkodër. E tashmë me situatën që duket se ka marrë një tjetër rrjedhë me se çfarë ishte parashikuar në fillim të këtij edicioni, Qarri mund të rikthehet sërish pranë 9 herë kampionëve të vendit. Gjithmonë duke konsideruar si fakt të kryer transferimin e Jukajt drejt Arabisë Saudite.
DUBLIMET – Vllaznia ka bërë shumë lëvizje si në hyrje e po ashtu në dalje të merkatos gjatë kësaj vere. Duke ndryshuar goxha fytyrën e skuadrës në krahasim me skuadrën e sezonit të shkuar. Ajo çfarë është vënë re në radhët e kuqebluve gjatë kësaj merkatoje ka qenë sigurimi i dy futbollistëve thuajse në çdo pozicion të fushës. Në mënyrë që rolet të jenë të dubluara në raste mungesash për kartonët apo dëmtimet gjatë sezonit të Superiores. Kështu në portë aktualisht në radhët e shkodranëve janë 3 futbollistë si Jukaj, Pohls dhe Bunjaj.
Të cilët japin siguri për ekipin e Martinit në katërkëndor. Mbrojtja është reparti ndoshta me më pak futbollistë që mund të dublohen, duke pasur parasysh skemën me 3 që përdor trajneri Martini. Ku si titullarë mund të konsiderohen Bajrami, Gjini dhe Kuros. Të cilët në rast nevoje apo rotacioni mund të zëvendësohen edhe nga Gurishta apo Pusi. Në krahun e majtë ka siguri me emra si Jago apo Hakaj, teksa edhe djathtas, Gurishta dhe ndonjëherë Mala japin me të vërtetë kualitet dhe eksperiencë. Me këtë të fundit që mund të përdoret edhe në mesfushë, që është edhe reparti më i mbipopulluar tek Vllaznia. Ku emra si Krymi, Dros, Sala, Qato, Kallaku, Tafili dhe Murataj duhet të “luftojnë” fort mes tyre për të siguruar 3 vendet në formacion, bazuar në skemën 3-5- 2 që aplikon Martini.
Sulmi po ashtu ka opsione me dyshen Balaj – Kastrati që në letër konsiderohen si titullarë. Teksa si një alternativë në repartin e avancuar mund të cilësohet edhe Mensah e ndërsa shansin e tyre gjatë edicionit do të presin edhe Kubazi e Ara. Dy futbollistë të ardhur rishtazi nga radhët e akademisë kuqeblu dhe që deri më tani kanë bindur trajnerin Martini. Një skuadër kjo e plotësuar e Vllaznisë këtë edicion që ka mundësi dhe opsione të shumta për të interpretuar në fushën e lojës.
Endri ÇINARI
