Bekim Balaj vijon të kryesojë tabelën e golashënuesve më të mirë të Superiores, ku pas 30 javëve të këtij kampionati, shkodrani ka shënuar 14 herë duke qenë në këtë statistikë futbollisti më i mirë në elitën e futbollit tonë. Në analizën që gazetari i Panorama Sport, Endri Çinari, bën për kapitenin kuqeblu, nënvizon mungesën e golave të shënuar prej tij gjatë periudhës së fundit dy mujore, të cilat natyrshëm kanë ndikuar edhe në rezultatet e Vllaznisë.
Shtatlarti, në garën për “Këpucën e Artë” po rivalizohet nga Itodo dhe Lushkja, të dy futbollistët në kuotën e 12 golave deri tani në Superiore. Por ish-sulmuesi i kombëtares në periudhën e fundit po vuan një moment “thatësire”. Golat kanë munguar për 34-vjeçarin, duke ndikuar disi edhe në atë çfarë ka dhuruar Vllaznia në fushë. Pavarësisht kontributit të tij shumë të rëndësishëm në fushën e lojës, kapiteni i Vllaznisë ka shumë ndeshje që nuk është konkret dhe vendimtar me golat e tij për 9 herë kampionët e vendit.
Kështu, Balaj, mes ndeshjeve të kampionatit dhe kupës, nuk gjen golin prej thuajse 2 muajsh tashmë. Një periudhë “agjërimi” për ish-sulmuesin e Tiranës që nuk gjen rrjetën që nga data 31.1.2025, ku Balaj shënonte një nga golat në fitoren 1-3 të Vllaznisë ndaj Teutës në javën e 23- të të Superiores. Që nga ajo ndeshje janë luajtur 7 ndeshje në kampionat dhe 2 të tilla në kupë në takimet çerekfinale kundër Elbasanit, duele ku Balaj nuk ka arritur të gjejë në asnjë moment rrugën e rrjetës.
DY MUAJ – Shkodrani ka zbritur si titullar në të gjitha këto takime, duke luajtur minutat e plota. Me përjashtim të ndeshjeve kundër Partizanit ku u largua nga fusha në minutën e 81-të dhe ndaj Tiranës në minutën e 84-ët. Por shkodrani ka luajtur 30 minuta shtesë në duelin e kthimit të çerekfinales ndaj Elbasanit në Shkodër. Një total prej 825 minutash pa gjetur golin për sulmuesin kryesor të kuqebluve.
Statistika që patjetër nuk tregojnë vlerat e mëdha që sulmuesi ka për Vllazninë, por që vërtetojnë se kur Balaj nuk shënon, kuqeblutë e kanë shumë të vështirë për të arritur te suksesi. Pasi në 9 ndeshje ku kapiteni i skuadrës nuk ka gjetur rrjetën, Vllaznia ka arritur të marrë vetëm dy fitore, kundër Partizanit 2-0 dhe kundër Bylis në shifrat 3- 0. Patjetër te 9 herë kampionët e vendit shpresojnë që Balaj të kthehet te goli sa më shpejt. Në mënyrë që të jetë i rëndësishëm për fatet e skuadrës në një epilog sezoni, ku Vllaznia po lufton për fitimin e kampionatit dhe kupës.
Endri ÇINARI