Në pritje të ndeshjes Vllaznia-Tirana, takim ky i vlefshëm për Javën e 25-të të Kategorisë Superiore që do të luhet pasditen e së shtunës në “Loro Boriçi” duke nisur nga ora 16:45, Klubi kuqeblu ka nxjerrë në treg biletat.
Sipas njoftimit zyrtar të KF Vllaznia, edhe pse sfida në fjalë është më e spikatura e kësaj jave, në politikën e klubit kuqeblu është parë e arsyeshme që çmimet e biletave të jenë të arsyeshme.
Ato do të variojnë nga çmimi më i lirë, 200 lekë në tribunat C, por edhe atë E ku janë programuar të sistemohen tifozët bardheblu. Ndërkohë, në tributat e tjera, çmimet variojnë nga 500, 1000 dhe 1500 lekë.
Ndërkohë, ashtu si edhe në ndeshjet e tjera, bazuar në një vendim të marrë nga presidenti kuqeblu Alban Xhaferi, hyrja e femrave në stadium është falas.
“NJOFTIM
Duke filluar nga sot nisja shitja online e biletave të ndeshjes Vllaznia- Tirana e cila luhet ditën e shtunë në orën 16.45 në stadiumin “Loro Boriçi”. Biletat mund t’i blini duke klikuar në linkun e mëposhtëm: http://bileta.fshf.org/. Ndërkohë nga nesër nis shitja në sportelet pranë stadiumit. Eja edhe TI! Forca Vllaznia!”, shkruhet në postimin zyrtar të KF Vllaznia.