Erzeni-Kastrioti 0-0
Diçka nuk shkon në radhët e shijakasve. Pas humbjes në transfertë me Vllazninë, 3-1, Erzeni barazon në shtëpi 0-0 me Kastriotin duke mos provuar shijen e fitoreve prej katër javësh. Me këto pikë të humbura, Erzeni jep sinjale të largimit nga zona Europiane. Një objektiv ky që në fakt, tekniku Xhevahir Kapllani, e ka mohuar ta ketë pasur skuadra e tij. Megjithatë, duke parë ecurinë e suksesshme në periudhën e mëparshme, tifozëria shijakase, është ushqyer me të duke ëndërruar që të bëhet realitet.
45 minutat e para janë paraqitur disi të vakët, me shumë gabime në mesfushë e pak për të entuziasmuar publikun në shkallët e stadiumit. Mund të përmendet vetëm tentative e Osmanllarit, në minutën e 38-të me mbrojtjen krutane që spastroi zonën. Ndërsa në të dytën Erzeni mori frenat e lojës, por pa arritur të gjente golin. Në minutën e 59-të Ademi lëvizi mirë në zonë, por goditja e tij u bllokua nga Hasani. Megjithatë, mundësia më e mirë për Erzenin do të vinte në minutën e 71-të, kur goditja e Enk me kokë gjen të përgatitur portierin Sali që me devijimin e tij, bën që topi të përplaset në shtyllë, e me Kapllanin që nuk i jep kuadrat goditjes së tij.
Përfundimisht, 0-0 duke e lënë Erzenin në vendin e pestë në kuotën e 38 pikëve. Ndërkohë, edhe pse fitorja do të ishte idealja për Kastriotinm në kampin krutan, ky barazim, mund t’i japë disi frymëmarrje Kastriotit, me shpresën për të mbijetuar në Kategorinë Superiore.