Dy miqësore ka programuar Vllanzia gjatë ditëve përgatitore që po zhvillon në Pogradec. Përballë do të ketë dy skuadra me emër, si Dinamo dhe Skënderbeu, të cilat sezonin e ri futbollistik 2022-2023 do ta luajnë në kategorinë e parë të futbollit shqiptar.
Miqësorja e parë është plafikuar të luhet pasditen e sotme në stadiumin “Gjorgji Kyçyku” të Pogradecit duke filluar nga ora 18:00, ndërkohë që miqësorja tjetër e dytë dhe e fundit në ditët përgatitore pogradecare do të luhet në fundjavë.
Përpos shtatlartit, Klejdi Paloka, i cili në marrëveshje mes klubit Vllaznia dhe atij Otrant ka kaluar në formë huazimi për këtë sezon pranë klubit shqiptar ulqinak të kampionatit të kategorisë së parë malazez, e gjithë pjesa e tjetër kuqeblu është në dispozicion të trajnerit Josa.
Edhe pse gjatë ditëve të fundit është folur shumë për rihapjen e merkatos së Vllaznisë duke pasur në objektiv veshjen kuqeblu të një apo dy futbollistëve, kryesisht të sektorit sulmues, stafi teknik është duke i bërë llogaritë që formacioni i parë të dalë nga kontigjenti aktual që po stërvitet në Pogradec.
Pozitive për Josën është përmirësimi i ndjeshëm i parametrave fizik i kosovarit Liridon Latifi, i cili si pasojë e një gjendje të rënduar shëndetësore që e shoqëroi për shumë ditë humbi shumë nga forma sportive duke mbetur larg grupit të parë.
Që do të thotë, se nëse vertet Latifi vjen në formën e tij ideale, atëhereë gjërat pritet të ndryshojnë shumë për mirë në kampin kuqeblu. Gjithësesi, dy miqësoret e programuara me Dinamon dhe Skënderbeu, do të jenë testi kryesor i kuqebluve për kampionatin e ri, starti i të cilit do të jetë me 20 gusht, ku Vllaznia në javën e parë do të jetë mysafire në Shijak për të luajtur me Erzenin debutues.
