Java e dytë e “Abissnet Superiore”, Partizani vendoset në vendin e parë pas fitores me Laçin. Fitore dhe për Tiranën në fushën e Egnatias. Vllaznia siguron tri pikët në limite në përballjen me Kukësin. Kastrioti barazon pa gola me Erzenin, ndërsa Teuta barazon 1-1 me Bylisin. Gjithçka në “Rubrika Sportive” në RTSH në analizën e Shkëlqim Muçës.
Dominimi i Partizanit – “Ishte një ndeshje ku Partizani e meritoi plotësisht fitoren. Në pjesën e dytë Laçi nuk ekzistonte në fushë. Kishte ndryshime nga ndeshja e parë, stafi kishte nxjerrë mangësitë. Skuadra ishte agresive, por dhe vendosja e tre sulmuesve nuk ishte ajo klasike. Kjo vendosje ndoshta e vuri në vështirësi Laçin. Edhe në aspektin fizik Partizani ishte një hap para kurbinasve. Më duket i çuditshëm rikthimi i një trajneri që ka dështuar vjet te kurbinasit”.
Fitorja e shkodranëve – “Ndeshje me oshilacione nga të dy skuadrat. Vllaznia e nisi mirë, ishte më superior. Më pas, Kukësi arriti të barazojë dhe mund ta kishte fituar ndeshjen. Ka potencial si skuadër, ka shumë lojtarë”
Skuadër cinike – “Tirana me skuadrat e cilësuara të vogla është cinike, krijon pak raste por shënon, tri pikë janë dhe ato. Është një skuadër që ka cilësi, por nuk më duket më i fortë se në sezonin e kaluar. Ndoshta me kalimin e javëve mund të bëhet më agresive dhe mund të kontrollojë ndeshjen edhe më shumë. Kallaku? Duhet të kuptojë se luan tek Tirana. Duhet të ketë qëndrueshmëri, në çdo ndeshje të jetë aty”.
Si në sezonin e kaluar – “Teuta, si në sezonin e kaluar, duket si një skuadër që nuk ka shumë pretendime. Do të shikojmë më tej se cilat do të jenë synimet, për të shkuar në Europë apo për të luftuar poshtë. Pasi u shpallën kampionë, skuadra nuk u rinovua me lojtarë cilësorë, nuk u duk si një klub që ka ambicie për të shkuar larg. Bylis, apo Erzeni janë skuadra që do të luftojnë për mbijetesë”.
