Tirana realizon një prej goditjeve më të mëdha të merkatos së janarit. Regi Lushkja është lojtari më i ri i Tiranës. Lajmin e ka bërë të ditur vetë klubi bardheblu.
Ai ishte edhe në orbitën e Partizanit, por duket se Tirana e ka fituar këtë derbi në merkato. Kavajasi ishte joshur nga oferta e presidentit Refik Halili, paçka se në lojë për shërbimet e tij u fut edhe Partizani. Dhe derbin në merkato e fitoi Tirana, teksa kishte mbetur vetëm firma në kontratë për të konkretizuar marrëveshjen, e cila ka ardhur.
Lushkja vjen pas përvojës në Moldavi me Sherif Tiraspolin dhe gjasat janë që te bardheblutë të luajë në formë huazimi vetëm për gjashtë muajt e mbetur të këtij sezoni. Megjithatë, interesant është fakti se klubi bardheblu e ka të bllokuar merkaton nga FIFA, për shkak të mosshlyerjes së detyrimeve të prapambetura. Organizmi që qeveris futbollin botëror e ka bllokuar merkaton e bardhebluve për shkak të një detyrimi prej 106,000 Eurove që Tirana u ka dy ish-lojtarëve nga Amerika Latine, brazilianit Elton Kale dhe argjentinasit Agostin Torrasa.
Ndërkohë, në klubin kryeqytetas kanë njoftuar se po negociohet me FIFA-n për ta zgjidhur këtë ngërç, për ta shlyer mbase me këste këtë detyrim, por nuk jepet informacion se si dhe se kur mund të marrë udhë zgjidhja e kësaj çështjeje. Kjo e bën edhe më të çuditshme nënshkrimin dhe prezantimin e Lushkjes, për më tepër kur mban parasysh se 26-herë kampionët e Shqipërisë e nisën vitin 2023 me një grevë, duke mos dalë në stërvitje për shkak të mosshlyerjes së pagave për këto muajt e fundit.
Bardheblutë u kthyen në stërvitje vetëm pas një takimi me presidentin e klubit, Refik Halili, ku morën garancinë e këtij të fundit për likuidimin e pagave të prapambetura brenda këtij muaji. Kjo e bën edhe më të mjegullt gjendjen tek Tirana, teksa kanë mbetur vetëm pak ditë deri në nisjen e gjysmës së dytë të sezonit aktual të Kategorisë Superiore.
