Teuta-Partizani 0-2 (Mba 10’, Hoti 83’)
Të kuqtë e Partizanit të drejtuar nga trajneri Kolela kanë marrë një fitore shumë të rëndësishme teksa mundën sot në transfertë Teutën e Durrësit me rezultatin 0 me 2 duke dhënë sinjale serioze për fitimin e titullit kampion. Ndeshja e luajtur në stadiumin “Niko Dovana” filloi me gol për Partizanin, i cili shënoi që në minutën e 10-të me autor Mba. Sulmuesi i ardhur nga Trepca 89’ shënoi me kokë, pas krosimit të ardhur nga e djathta. Goli i dytë me fanellën e të kuqve për Mba, që e bëri ndeshjen më të lehtë për kryeqytetasit. Madje Teuta rrezikoi të pësonte edhe të dytin, në gabimin e Qirkos në rivënie, në të cilin Da Silva i shërbyer nga Rrapaj duhet ta kishte shfrytëzuar më mirë.
Do të kishte qenë goli i sigurisë, por ndoshta do ti kishte humbur agonizmin ndeshjes. Reagimi i Teutës erdhi, por jo me forcën që duhej për të thyer barrierën e ngritur nga të besuarit e Colella. Rexhepi u kujdes të ndiqte konkluzionin e Kuros që shkoi në rrjetën e jashtme në të 20’, por iu desh të bënte shumë më tepër në skadencë të pjesës së parë, kur mbrojtësi goditi fluturimthi në zonë.
Teuta e nisi në sulm, me Kallakun që nuk pati kënaqësinë të festonte golin e ish-it, sepse Rexhepi devijoi në kënd. Partizani luajti kartën e rifillimeve e me Hadrojin në të 51’ i kujtoi durrsakëve se edhe duhet të mbroheshin. E megjithatë me rezultatin për tu ndjekur vështirë që vendasit mos dilnin në aventurë, por gjetën përpara një Rexhepi në superformë, të aftë ti mohonte golin edhe Lorenco Vilës në të 56’.
Colella freskoi manovrën me Buxhelajn, Carën e Hotin e ky i fundit dha sinjalin në të 64’, siç duket për ti marrë masat kuadratit të mbrojtur nga Qirko. Teuta në anën tjetër nxitonte të evitonte humbjen, por gaboi në minutën e 83-të, duke humbur topin në një zonë të rrezikshme. Hoti përfitoi dhe shënoi golin që mbylli ndeshjen.
Me golin e dytë shënuar nga Hoti, Partizani vulosi fatin e krejt takimit, të cilin e fitoi me meritë me rezultatin 0 me 2. Fitore që kjo i rikonfirmon të kuqtë si kryesues të kampionatit duke pritur rezultatin e rivalit më të afërt, Tiranës, e cila luan nesër me Erzenin e Shijakut në “Elbasan Arena”.
