Vllaznia dhe Partizani në Volejboll për femra, luajnë sot gjysëmfinalen e dytë të Superligës, faza Play-Off. Sfida në fjalë do të luhet në pallatin e sportit, “Qazim Dervishi” duke filluar nga ora 17:00, ku të dyja skuadrat vijnë në këtë ballafaqim të dytë pas ndeshjes së parë luajtur tre ditë më herët në kryeqytet.
Në duelin e parë të luajtur në pallatin e sportit “Asllan Rusi” të Tiranës, Partizani ishte dominues duke arritur t’i mbyllë të trete setet në favorin e tij. 25 me 19 ishin shifrat e setit të parë, 25-9 i dyti dhe 25-18 i treti, duke fiksuar fitoren e të gjithë ndeshjes me rezultatin 3 me 0.
Në këtë mënyrë, Partizani, vjen sot në Shkodër me avantazhin e fitores së ndeshjes së parë për të kërkuar fitoren e dytë dhe kualifikimin për në finalen e madhe të Kampionatit.
Për volejbollistet shkodrane të drejtuara nga trajneri Dorjan Tafa, sfida e sotme është e një shkalle vështirësie jo të vogël, kur kemi parasysh se përballë do të ketë një Partizan, skuadër e cila është e përforcuar edhe me volejbolliste të huaja duke qënë edhe pretendent kryesor për fitimin e titullit kampion.
Megjithatë, me mbështetjen edhe të tifozërisë shkodrane, e cila pritet të jetë e madhe në numër, Vllaznia do të luftojë fort për të bërë më të mirën në fushën e lojës. Një fitore e sotme e Vllaznisë, bën që dy skuadrat të luajnë një ndeshje të tretë përsëri në Tiranë. Ndërkohë, nëse Partizani fiton edhe në Shkodër, atëherë ai kualifikohet në finale.
