Drejtuesit e Klubit të Futbollit Vllaznia kanë programuar që herë pas herë të sjellin pranë skuadrës kuqeblu personazhe të njohura të futbollit shkodran me qëllimin e mirë për të përcjellë tek skuadra mesazhin pozitiv në prag të ndeshjeve zyrtare.
Një gjë e tillë është aplikuar në prag klasiken e famshme, Vllaznia-Tirana, ndeshje kjo që do të luhet pasditen e së shtunës në stadiumin “Loro Boriçi” duke nisur nga ora 17:00.
Këtë radhë, dy personazhet e njohur të ftuar nga KF Vllaznia, janë Hysen Zmijani dhe Avenir Dani, i pari mbrojtës i djathtë dhe i dyti portjer, që të dy kampion me Vllazninë dhe pjesë të kombëtares së Shqipërisë.
Në takimin e organizuar në një nga hotelet ku është grumbulluar Vllaznia në prag të ndeshjes me Tiranën, pasi janë prezantuar nga presidenti Alban Xhaferi, dyshja, Zmijani-Dani, kanë risjellë në vemendje për futbollistët e pranishëm kujtime nga jeta e tyre sportive, sidomos përballjet derbi me Tiranën. Momente këto që janë pritur mjaft mirë dhe me duartrokitje nga vetë futbollistët dhe stafi i tyre teknik për një karikim më shumë për ta kurorëzuar me sukses sfidën e së shtunës me bardheblutë.
Pas mesazheve të tyre moralizuese dhe urimin për një fitore të përballjes me Tiranën, dy ishfutbollistët e njohur, Hysen Zmijani dhe Avenir Dani, kanë darkuar me skuadrën duke krijuar një atmosferë të ngrohtë në kampin kuqeblu.
