Elbasani dhe Bylisi kanë ndarë nga një pikë në përballjen e javës së 26-të të “Abissnet Superiore”, në një sfidë të luftuar deri në sekondat e fundit, e cila u mbyll me rezultatin 1-1.
Takimi i zhvilluar në “Elbasan Arena” nisi me ritëm të lartë, me vendasit që kërkuan të merrnin kontrollin e lojës përmes qarkullimit të topit dhe presionit në gjysmëfushën kundërshtare. Verdheblutë krijuan disa situata të rrezikshme në pjesën e parë, por pa arritur të konkretizojnë përpara portës mike. Nga ana tjetër, ballshiotët u treguan të kujdesshëm në mbrojtje dhe tentuan të godasin në kundërsulm.
Pjesa e dytë foli më shumë për miqtë. Në minutën e 61-të, pas një ndërhyrjeje të gabuar në zonë, gjyqtari akordoi penallti për Bylisin. Nga pika e bardhë u paraqit Stoilov, i cili nuk gaboi, duke dërguar topin në rrjetë dhe duke kaluar ekipin e tij në avantazh 0-1. Pas pësimit të golit, Elbasani rriti ndjeshëm presionin dhe zhvendosi lojën thuajse tërësisht në gjysmëfushën e kundërshtarit. Trajneri vendas ndërhyri me zëvendësime për të shtuar forcën sulmuese, ndërsa minutat kalonin dhe tensioni në fushë rritej.
Kur dukej se Bylis po largohej me tri pikë të arta, në minutën e 87-të erdhi momenti vendimtar. Loukili provoi me një goditje drejt portës, topi u devijua në rrugë e sipër dhe përfundoi në rrjetë, duke rikthyer baraspeshën dhe duke ndezur entuziazmin e tifozëve vendas. Në minutat shtesë të dy skuadrat tentuan të gjenin golin e fitores, por rezultati mbeti i pandryshuar deri në vërshëllimën përfundimtare.
Me këtë barazim, Elbasani shkon në kuotën e 46 pikëve dhe mban vendin e dytë në renditje, duke vijuar të jetë në garë për objektivat sezonalë. Në krahun tjetër, Bylis grumbullon 24 pikë dhe mbetet në vendin e tetë, duke kërkuar pikë të rëndësishme në javët e mbetura për të siguruar mbijetesën.
