Projekti i Automotoparkut në Elbasan është një nismë madhore që synon të sjellë një nga investimet më të jashtëzakonshme sportive, me standarde ndërkombëtare i cili synon ta pozicionojë Shqipërinë si një destinacion tërheqës për turizmin sportiv global. Ky projekt i detajuar është dorëzuar vetëm dje nga studioja fituese e konkursit ndërkombëtar dhe është pjesë e një iniciative të fuqishme që synon të bëjë Elbasanin epiqendrën e një infrastrukture moderne dhe të avancuar për sigurinë rrugore dhe sportin që do të ofrojë mundësi të shumta për testime, gara, mësime dhe argëtim për të gjitha moshat.Automotoparku i Elbasanit do të jetë një kompleks sportiv ndërkombëtar i cili do të plotësojë të gjitha kërkesat dhe standardet më të larta të Federatës Ndërkombëtare të Automobilizmit (FIA) dhe të Federatës Ndërkombëtare të Motociklizmit (FIM). Ky kompleks sportiv gjigand nuk do të jetë thjesht një pistë për garat e Formulës 1, por një qendër që do të ofrojë mundësi për zhvillimin e aktiviteteve edukative dhe testimeve të sigurisë për të gjitha moshat dhe nivelet. I vendosur në Elbasan ky projekt do të sjellë përfitime të shumta për ekonominë dhe imazhin e Shqipërisë duke tërhequr jo vetëm tifozët e sporteve automobilistike, por edhe vizitorë dhe investitorë të tjerë nga e gjithë bota.
Përgatitjet për gara të mëdha dhe siguri rrugore
Një nga komponentët kryesorë të këtij projekti është krijimi i një qendre europiane të sigurisë rrugore që do të luajë një rol të rëndësishëm në edukimin dhe trajnimin e shoferëve duke përfshirë fëmijët dhe të rriturit që ngasin makinat. Ky projekt është frymëzuar nga modelet më të avancuara europiane sikurse është qendra e sigurisë rrugore në Vjenë dhe do të ndihmojë në rritjen e nivelit të sigurisë rrugore në Shqipëri. Ai do të përfshijë aktivitete testimi dhe mësimi për automobila dhe motoçikleta si dhe mundësi për zhvillimin e trajtimeve dhe trajnimeve për shoferët dhe përdoruesit e rrugëve në tërësi.
Gara e Formula 1 është padyshim një nga ngjarjet më të mëdha dhe më prestigjioze që do të mbahet në këtë kompleks me 300 mijë spektatorë të pranishëm fizikisht dhe mbi 1 miliard shikues në ekran duke e bërë Elbasanin një qendër të re të turizmit sportiv në rajon. Kjo ngjarje do të sjellë gjithashtu mundësi për zhvillimin e aktiviteteve turistike dhe argëtuese që do të kontribuojnë në zhvillimin e ekonomisë lokale dhe kombëtare.
Një Ambicie për Shqipërinë 2030
Kryeministri Edi Rama e prezantoi këtë projekt me entuziazëm këtë të Premte në Elbasan duke theksuar se ky është një hap i madh për Shqipërinë dhe për Elbasanin si dhe një mundësi për ta vendosur vendin tonë në hartën globale të sporteve të motorëve. Ai theksoi se Shqipëria ka ambicien që deri në vitin 2030 të jetë një nga vendet pritëse të garës prestigjioze të Formula 1, një mundësi që deri tani dukej e pamundur, por që tani është në prag të realizimit. Përmes këtij projekti, Rama theksoi se Shqipëria nuk po investon vetëm në sport, por edhe në zhvillimin e një infrastrukturë që do të ndikojë pozitivisht në ekonomi dhe në cilësinë e jetesës së qytetarëve.
Projekti si nxitës i ekonomisë dhe kulturës lokale
Përveç aspektit të sportit, projekti i Automotoparkut të Elbasanit është një mundësi e shkëlqyer për zhvillimin e turizmit sportiv dhe jo vetëm si edhe i kulturës lokale. Rama theksoi se ky projekt do të kontribuonte në krijimin e mundësive të reja ekonomike dhe do të bënte Elbasanin një qytet më të njohur dhe më të zhvilluar, duke u bërë një “xhevahir” i kulturës dhe zhvillimit. Ky kompleks do të përfshijë gjithashtu një hapësirë për aktivitete kulturore dhe arsimore si dhe do të ofrojë mundësi për të rikthyer shkëlqimin e disa elementeve të kulturës lokale.Së fundmi, Rama e theksoi rëndësinë e lidhjes së Tiranës me Elbasanin dhe integrimin e këtyre dy qyteteve në një metropol të ri që do të formojë një pikë kyçe për zhvillimin e rajonit dhe të gjithë Shqipërisë. Në vitet që vijnë, ky projekt do të jetë një model i bashkëpunimit mes autoriteteve, investitorëve dhe qytetarëve, për të ndihmuar në realizimin e një vizioni të përbashkët për një Shqipëri të zhvilluar dhe të njohur në skenën ndërkombëtare.Automotoparku i Elbasanit do të jetë një hap i rëndësishëm i zhvillimit për Shqipërinë duke ofruar mundësi të mëdha për zhvillimin e sporteve automobilistike, sigurisë rrugore dhe turizmit sportiv, duke i dhënë një shtysë të madhe ekonomisë dhe imazhit të vendit në vitin 2030 dhe përtej.
Fatmir POPJA-Elbasan