Roko Vata, është konsideruar nga mbarë specialistët si një talent tepër premtues. Djali i ish-kapitenit të Kombëtares, Rudi Vata, ka debutuar me skuadrën e parë të Sëlltik në Skoci në moshën 17-vjeçare në fillim të këtij viti, teksa gjasat janë të mëdha që karriera e tij të jetë e suksesshme.
Roko momentalisht e përfaqëson Irlandën U-21. Ditë më parë, Rudi Vata në një intervistë për mediat kosovare, tha se nëse djali i tij ftohet nga Shqipëria, përgjigja do të jetë pozitive.
Ndërkohë në lidhje për talentin Roko Vata ka folur edhe trajneri i Shpresave, Alban Bushi, që për “lajmi.net” ka deklaruar:
“Ne shpresojmë shumë që Roko Vata të përfaqësojë Shqipërinë në të ardhmen, sepse është një nga lojtarët e datëlindjes 2005 ndër më cilësorët në Europë”, u shpreh ndër të tjera Alban Bushi. (Panorama Sport)
