Pastërtia e dhomës së zhveshjes së kombëtares në “Alianz Arena” bëhet viral
Përtej futbollit, ekziston edhe edukata e kultura. E këtë e ka shprehur më së miri kombëtarja e futbollit e Rumanisë. Pas eliminimit nga Holanda në Euro 2024, futbollistët e kombëtares rumune e kanë lënë dhomën e zhveshjes në Alianz Arena të pastër dhe të rregullt. Ata kanë nënshkruar edhe një notë falenderimi për Gjermaninë, vendin pritës të “Euro 2024”.
Rumania është eliminuar nga Holanda në fazën e 16-shes në Euro 2024, por kjo nuk e zbeh aspak rrugëtimin e suksesshëm të kësaj kombëtareje, kur dolën të parët e grupit, duke lënë pas Belgjikën e Sllovakinë. Por kjo kombëtare do të mbahet mend edhe për imazhin e mirë që la në këtë turne. Gjendja e dhomës së zhveshjes së kombëtares rumune në stadiumin e Mynihut, “Alianz Arena”, pas humbjes së pësuar nga holandezët, është bërë virale.
Çdo gjë është lënë në një rregull perfekt, pastërti absolute, si dhe një mesazh mirënjohjeje në rumanisht dhe gjermanisht. “UEFA EURO 2024 ishte një nga eksperiencat tona futbollistike më të rëndësishme në histori dhe jemi të kënaqur që ishim pjesë e ktij turneu që u zhvillua në Gjermani. Çdo emocion, ndeshje e eksperiencë na bashkoi rreth magjisë së futbollit.
Ishte një nder për ne të ishim pjesë e familjes së madhe të futbollit evropian. Falenderojmë të gjithë ata që na bënë të ndjehemi si në shtëpinë tonë” – shkruhej në letër. Një detaj ky që nuk ka kaluar pa u vënë re dhe që flet për mënyrën e kulturuar sportive të rumunëve për të pranuar humbjet.
Vërtet lojtarët e kombëtares rumune nuk e mundën dot Holandën, por janë fitues të një arsye tjetër po aq të rëndësishme.
