Emocione të mëdha dhe plot 6 gola ka dhuruar sfida, që hapi javën e dytë të kampionatit Abissnet Superiore. Por, spektakli nuk prodhon asnjë fitues në “Adush Muça”, pasi ndeshja Flamurtari-Bylis përfundon në barazim 3-3.
Vlonjatët kalojnë të parët në avantazh, falë një goli të shënuar Bourard, nga pika e bardhë e penalltisë. Erlad Maksuti shënon golin e dytë për Flamurtatin, por Bylisi reagon menjëherë, duke shkurtuar shifrat në aksionin pasardhës me Ualison.
Pjesa e dytë nis menjëherë me gol. Bylisi shënon golin e barazimit me Mouctar. Loja është e bukur dhe me ritëm. Flamurtari kalon sërish në avantazh me Maksutin, ndër më të mirët në fushën e lojës, që shënon golin e dytë personal.
Mallkastriotët kundërpërgjigjen me Ualison, që rikthen sërish ekuilibrin në fushë. Në minutat e mbetura, të dyja skuadrat mundohen të gjejnë golin e avantazhit, por pa arritur që të shënojnë.
Mbyllet në barazim 3-3 ndeshja. Flamurtari merr pikën e parë në kampionat, ndërsa Bylisi koleksionon barazimin e radhës, pas atij ndaj Tiranës në javën e parë.
