Vllaznia-Kukësi 8-0 (Shënuese: Franja(2), Doçi(3), Shala(2), Kodra)
Vllaznia-Kukësi, 8 me 0. Ky është rezultati i regjistruar në ndeshjen e sotme luajtur në stadiumin “Reshit Rusi” të qytetit të Shkodrës. Fitore kjo e gjashta radhazi duke bërë që Vllaznia të shkojë në kuotën e 18-të pikëve duke qënë e vetme në kryesimin e kampionatit kombëtar me 18 pikë të plota.
Për skuadrën kuqeblu, sfida e sotme e vlefshme për javën e gjashtë të Kampionatit Kombëtar, ishte si një tip testi për ndeshjen ndërkombëtare që Vllaznia do të luajë mesjavën e ardhshme në Paris për fazën e grupeve të Ligës së Kampioneve të Europës në futboll femra.
Ishte kjo arsyeja që tekniku Nikolin Leka hodhi në fushën e lojës formacionin më të mirë, me të cilin do të përballet me kampionet pariziene të mërkurën e ardhshme. Një ndeshje, e cila që nga fillimi dhe deri në fund u dominua nga skuadra shkodrane, që në fakt, edhe pse kishte përballë një kundërshtar me emrin e Kukësit, i gjithë formacioni i kësaj skuadre të drejtuar nga futbollistja e njohur e Juban Danjes, Paola Jaku, ishte i përbërë nga futbolliste shkodrane, pjesë e ekipit të Murlanit të mëparshëm.
Tetë golat e shënuar nga Vllaznia në portën e Kukësit, kanë për autore: kapitenen Esmeralda Franja(2), Megi Doçi(3), Jehona Shala(2), dhe Arlinda Kodra.
E veçanta e kësaj ndeshje ka të bëjë me faktin se me tre golat e shënuar sot ndaj Kukësit, sulmuesja e Vllaznisë, Megi Doçi ka mbërritur në kuotën e 600 golave të shënuar me uniformën kuqeblu. Një shifër kjo rekord për futbollin shqiptar, por edhe më tej, në arenën ndërkombëtare.