Kampionati Kombëtar i kategorisë së parë për Akademinë Djelmnia Shkodrane ka nisur në mënyrën më të mirë. Ekipet e saj U-17 dhe U-19 të drejtuara nga trajnerët Arbër Shytani dhe Valdano Nimani po bëjnë një figurë shumë të mirë sportive. Këtë e tregojnë vetë rezultatet e arritura në dy javët e para, ku në katër ndeshje, bilanci është tre fitore dhe një barazim. Konkretisht, në javën e parë të kampionatit duke qënë mysafirë në Peshkopi përballë ekipeve të Korabit, Djelmnia Shkodrane U-17 fitoi thellësisht me rezultatin 0 me 8, ndërkohë që ekipi tjetër Djelmnia Shkodrane U-19 barazoi 0 me 0.
Ndërkohë, për javën e dytë të kampionatit, dy ekipet respektive të Djelmnisë Shkodrane U-17 dhe U-19, ndeshjet e tyre i luajtën në shtëpi pranë fushës sportive të Shtojit duke pasur përballë ekipet respektive të Akademisë së Futbollit Kukësi. Ndeshje këto, në të cilat ekipet e Djelmnisë Shkodrane shfaqen superioritet të dukshëm ndaj rivalëve të tyre kuksianë. 4 me 0 në favor të Djelminisë Shkodrane është mbyllur ndeshja e kategorisë U-17, golat e të cilës u shënuan që të gjithë në pjesën e parë me autorë Ilirjan Buhaj, Aldo Nika, Ermir Rekaj dhe Ledion Vitaj duke bërë që pas javës së dytë të kampionatit, skuadra e drejtuar nga trajneri Arbër Shytani të kryesojë e vetme tabelen e klasifikimit me 6 pikë dhe me golaverazh shumë pozitiv, 10 me 0.
U-17, Djelmnia Shkodrane-Kukësi 4:0
(Shënues: Ilirjan Buhaj 9’, Aldo Nika 14’(p), Ermir Rekaj 27’, Ledion Vitaj 38’)
Formacioni Djelmnia Shkodrane U-17: Formacioni: Giad Drinazi, Dean Baçina, Jozef Deda, Mateo Pjetri, Gjergj Nika, Ilirjan Buhaj, Ergli Kraja, Klaudio Narkaj, Ledjan Vitaj, Ermir Rekaj, Aldo Nika. Trajner Arbër Shytani(U aktivizuan gjatë ndeshjes: Gjorgjinjo Zhuja, Luis Hysaj, Arbi Hyseni, Ensar Çokaj)
Me fitore e ka mbyllur ndeshjen e javës së dytë edhe ekipi tjetër i Akademisë Djelmnia Shkodrane për kategorinë e moshës U-19. Skuadra e drejtuar nga trajneri Valdano Nimani ka luftuar fort që në start të takimit, por megjithë rastet e shumta të paraqitura përpara portës kundërshtare nuk ka arritur të shënojë duke shkuar në dhomat e zhveshjes për pushim mes dy pjesëve me rrjeta të paprekura. Pas kthimit në fushë, 45 minutat e dyta janë krejt ndryshe për Djelmninë Shkodrane. Ekipi vendas interpretoi më mirë detyrat e dhëna në fazen ofensive dhe si rezultat shënoi dy herë me protagonist Kledis Hurmin në minutën e 49-të dhe Vandi Bregun në të 67-tën. Gola këto që fiksojnë fitoren me meritë të Djelmnisë Shkodrane me rezultatin 2 me 0. Me një barazim dhe një fitore, Djelmnia Shkodrane U-19 me trajner Valdano Nimani është në kuotën e katër pikëve duke qënë mes skuadrave pretendente për trofe.
Fc Djelmnia Shkodrane 2017- Kukësi 2:0
(Shënues: Kledis Hurmi 49’, Vandi Bregu 67’)
Formacioni i Djelmnisë Shkodrane U-19: Marsel Rroku, Kledis Harmi, Erdit Trashani, Emiljano Ndrezaj, Kristian Sermi, Fatmir Pjollaj, Ervis Curri, Kristjan Ara, Armando Shkambi, Vandi Bregu, Bardhok Kerrci. Trajner: Valdano Nimani(U aktivizuan gjatë ndeshjes: Endri Haxhija, Emiljano Mehmetaj)
Dy fitoret në fjalë, 4 me 0 për U-17 dhe 2 me 0 për U-19 kundër një klubi si Kukësi i cili kunkuron me mjaft sukses edhe me Superligen Shqiptare me skuadrën e pare, janë pasqyrë e punës mjaft të mirë profesionale që bëjnë në përgjithësi trajnerët përkatës, si dhe në të njëjtën kohë edhe drejtori teknik i Akademisë së Futbollit Djelmnia Shkodrane, Kreshnik Krepi, tashmë me një përvojë të gjatë në fushën e trajnimit, përfshirë edhe atë me kategorinë e të rriturve në klube të njohur të vendit tonë. Nga sa bëhet e ditur, motoja e kësaj Akademia është vazhdimësia e të punuarit në mënyrën më të mirë nga baza deri lart, duke pasur si objektiv që këtë sezon futbollistik të kualifikohen në Superlig me moshat U-17 dhe U-19.
Ndeshjet e rradhës për ekipet e Djelmisë Shkodrane do të jenë në transfertë me Studentin. Të shtunën në oren 10:00 luan ekipi U-19, ndërkohë që ekipi U-17 luan një ditë më pas, të dielen po në orën 12.00, ndeshje këto që do të luhen në kompleksin sportiv Kamzë.
Gaspër MARKU
