Sloga-Vllaznia 0-4(Shënues: Gjoklaj, Djepaxhia, Tafili, Bashaj)
Formacioni i Vllaznisë: Behari, Gjoklaj, Tafili, Gokaj, Djepaxhia(U aktivizuan: Mesi, Bashaj, Çokaj). Trajner: Arben Xhaferi, Alsid Tafili
Turneu tradicional ballkanik i futsales, i cili zhvillohet çdo fillim viti në Ulqin të Malit të Zi, këtë edicion ka në përbërjen e tij edhe ekipin e Vllaznisë Futsal duke shënuar kështu rikthimin e futsales shkodrane pas tre vitesh pauze në këtë aktivitet.
Në Turneun “Ulqini Open 2025”, i cili ka nisur me datë 3 janar dhe do të vijojë deri më 18 janar konkurojnë 16 skuadra të ndara në katër grupe, të cilat do t’i zhvillojnë ndeshjet në katër faza. Sipas rregullores së aktivitetit, në fazën e parë kualifikohen tre skuadra për çdo grup për të vijuar konkurimin në fazën e dytë në grupe me nga tre ekipe, prej të cilave do të kualifikohen dy për grup. Në vijim, radhën e kanë ndeshjet çerekfinale, si dhe në fund finalja e madhe, e cila përcakton ekipin kampion të Turneut Ballkanik të futsales, “Ulqini Open 2025”.
Vllaznia e drejtuar nga trajnerët Arben Xhaferi dhe Alsid Tafili, bën pjesë në grupin B së bashku me skuadrat: Pablo’s Bar, Pro Conto dhe Slogaz.
Në grupin A konkurojnë ekipet: Ulqini, Zogajt,Turtullesh, Olcinium. Grupi C, ka në konkurim ekipet: Kraja kampion i vitit të kaluar, Prishtina, Rumija, Sloga Bar. Ndërsa, në grupin D, bëjnë pjesë ekipet: Ciling, Kotorri, Zjarrfiksat dhe Rrogathi-Tuz.
Në ndeshjen e parë, shorti e ka vënë Vllazninë Futsal përballë ekipit Pablo’s Bar, ndeshje kjo e zhvilluar mbrëmjen e së mërkurës në sallën sportive të Shkollës fillore “Marshall Tito”, Ulqin, Mali i Zi.
Një ndeshje kjo e dominuar plotësisht nga ana e ekipit shkodran, për të cilën flet vetë rezultati, 0 me 4 në favor të Vllaznisë. Skuadra kuqeblu e nisi ndeshjen me Beharin në portë, për të vijuar me kolegët e tjerë të fushës: Gjoklaj, Tafili, Gokaj, Djepaxhia, ndërkohë që gjatë lojës u aktivizuan edhe Mesi, Bashaj dhe Çokaj.
Katër golat që i dhanë fitoren Vllaznisë Futsal, mbajnë firmën e Gjoklajt, Djepaxhisë, Tafilit dhe Bashajt. Kuqeblutë e sallës e nisin kështu me fitore turneun “Ulqini Open 2025”, me synimin dhe objektivin për t’i shkuar deri në fund, drejt fitores së turneut.
Ndeshja e radhës për Vllazninë Futsal do të luhet me datë 9 janar duke u përballur me ekipin Pro Conto, e cila do të nis prej orës 18:00 në sallën sportive të Shkollës fillore “Marshall Tito”, Ulqin, Mali i Zi.
