Lulzim Bërsheni është një nga figurat e njohura të Vllaznisë në vitet 80-‘90. Ish-fantazisti që prej shumë vitesh jeton në Greqi, asnjëherë nuk humbet mundësinë për të ndjekur kuqeblutë apo edhe kampionatin shqiptar.
Në një intervistë për “Panorama Sport”, ai ka komentuar humbjen e fundit të kuqebluve ndaj Skënderbeut. Po ashtu, ai ka folur edhe për ecurinë që kanë pasur 9 herë kampionët e vendit, duke theksuar se skuadrës i mungon loja e bukur.
Bërsheni, sa keni pasur mundësinë ta ndiqni kampionatin shqiptar në këtë periudhë?
E kam ndjekur me shkëputje realisht kampionatin shqiptar, për shkak edhe të kohës sime. Por ndeshjet më të forta kam pasur mundësi t’i ndjek dhe, nga ajo çfarë kam vënë re, është se nuk ka ndonjë cilësi të madhe, pavarësisht se kampionati është i rivalizuar dhe ekipet janë të ngjeshura. Por kjo vjen si rezultat i rënies së nivelit në përgjithësi të kampionatit dhe jo se janë rritur ekipet. Megjithatë, e rëndësishme është që ka garë dhe rivalitet.
Cila është skuadra që bën diferencën më shumë, sipas jush?
Në mendimin tim, është Egnatia disi më lart se ekipet e tjera. Më duket një skuadër që, prej 2- 3 sezonesh, ka krijuar një futboll stabël dhe një ekip shumë serioz. Në këtë garë, pak pas tyre besoj se qëndrojnë Vllaznia dhe Dinamo, por që mund të kenë mundësinë e tyre, duke parë edhe vetë formulën që ka kampionati me ndeshjet e “Final 4”.
Sa mund të ndikojë kjo tek ecuria e skuadrës?
Dihet gjithmonë që një ekip pretendent nuk duhet kurrë të bëjë hapa fals në ndeshjet shtëpiake, sidomos ndaj kundërshtarëve që janë poshtë në tabelë dhe që nuk kanë pretendime. Kjo humbje në fund mund të ndikojë në llogaritë e Vllaznisë për të kapur dy vendet e para dhe do të ishte me të vërtetë mëkat, pasi edhe sezonin e shkuar pikërisht nga një barazim me Tiranën Vllaznia e humbi mundësinë të ishte në dyshen e parë në përfundim të edicionit.
Ishin më “zemërgjerë” seç duhet shkodranët?
M’u duk sikur skuadra e kishte marrë “lehtë” këtë ndeshje, në mos kishte faktorë të tjerë (qesh). Ekipi m’u duk shumë i shpërqendruar dhe la shumë hapësira. Edhe dëshira sikur mungonte, por pikët vlejnë njëlloj si me vendin e parë, dhe me atë të fundit. Vllaznia duhet të jetë dominuese në fushën e lojës dhe jo ta “lëshojë” lojën që të kontrollohet nga kundërshtari. Shpresoj që ekipi të bëjë autokritikë në ndeshjen e radhës që do të ketë.
Çfarë po çalon te loja e kuqebluve?
Grinta, në mendimin tim, futbolli i bukur që të gjithë shkodranët duan. Prandaj edhe stadiumi është bosh, sepse ekipi nuk ofron garanci për një lojë që të kënaq. Rezultatet nuk kanë qenë të dobëta, por skuadra gjatë thuajse gjithë sezonit nuk ka pasur stabilitet. Kjo të zhgënjen pak dhe prandaj duhet të shihet sa më shpejt çfarë është bërë gabim dhe të rregullohet. Gjithmonë, nëse ekipi pretendon trofe dhe të jetë në krye të tabelës.
Pse Brdariç nuk po arrin të shprehet me lojë?
Periudha e tij e parë është më ndryshe, sepse kishte lojtarë të tjerë dhe po ashtu ambienti ishte tjetër. Tani më duket nga larg se Brdariç ndodhet në presion, pasi nuk i lejohet dështimi dhe duket se loja e bukur është “harruar”. Por Vllaznia i ka elementët për të prodhuar gjëra të bukura, sepse, me futbollistë, si: Krymi, Mala, Dodaj, Balaj e të tjerë, ke mundësi për më shumë, në mendimin tim personal.
Ndeshja kundër Egnatias…
Kjo është një ndeshje ku Vllaznia duhet ta tregojë veten dhe pretendimet që ka. Skuadra gjithmonë ka ditur të shprehet kundër ekipeve të forta. Besoj se do jetë një sfidë për t’u shijuar dhe besoj se me përqendrim dhe zemër, Vllaznia mund t’ia dalë mbanë për rezultat pozitiv. Uroj që Vllaznia të na gëzojë të gjithëve në fund të këtij edicioni.
Vladimir MEMA