Suksesi i Vllaznisë në futboll për femra, e cila mbrëmjen e së mërkurës eleminoi kampionen e Ukrainës duke u kualifikuar në 12-të skuadrat më të mira të Europës ka marrë vemendjen e kreut të FSHF-së, Armand Duka, i cili përmes një postimi publik ka uruar skuadrën shkodrane për suksesin e arritur.
“Futbolli është i bukur se na dhuron emocione të ndryshme ditë pas dite.
Sot Vllaznia e vajzave ka shkruar historinë me fitoren kundër ekipit ukrainas të Vorskla Kharkiv dhe tashmë do të marrë pjesë në grupe të Champions League për herë të parë.
Urimet e mia më të sinqerta për vajzat e Vllaznisë, stafin drejtues dhe Presidentin Lazër Matija. Urime për punën e përditshme me vullnet, pasion e përkushtim për të qenë krenaria e qytetit tuaj të mrekullueshëm Shkodrës, por edhe Shqipërisë.
Në FShF kemi bërë një punë të jashtëzakonshme për mbështetjen e futbollit të vajzave, por ju, na treguat me punën tuaj, se duhet të bëjmë më shumë.
E tani, të jemi gati të shohim vajzat tona të Vllaznisë të shkruajnë historinë e të na përfaqësojnë denjësisht në Europë.
Urime Vllaznia. Urime vajza!”, shkruan presidenti i FSHF-së, Armand Duka.
