Prononcimi i trajnerit të Laçit, Mirel Josa, pas ndeshjes, Tirana-Laçi, 0-3
“Të themi të drejtën nuk kemi ndryshuar gjë taktikisht, thjesht lojtarët ishin më të motivuar, jo se nuk ishin në të tjerat. Unë kam ndjekur skuadrën gjatë gjithë kohës, jo vetëm Laçin, por të gjithë kampionatin. Nuk mund të vazhdohet përherë të fitosh, ne duam të fitojmë të gjitha, por problemi është që duhet të jemi shumë të vëmendshëm në këto momente se një fitore me Tiranën nuk është se na nxjerrë ku duam ne, duhet të marrim ndeshjet një nga një dhe të shohim se ku mund të arrijmë.
Ndryshova një strategji, duke pasur parasysh vendosjen e skuadrave në mesfushë. Por duke parë oreksin e djemve në skuadër, janë të rinj. Nga skuadra që kam lënë para një viti e gjysmë, kisha vetëm 3 lojtarë nga këto aktualisht, por janë djem që punojnë me shumë dëshirë, por duhet të kemi parasysh që kjo fitore të mos i shtojë presionin skuadrës. Se skuadra ka ndeshje shumë të forta.
Kampionati është shumë i fortë, duke parë skuadrat e tjera, ngritjet e uljet, këtë gjë nuk do ta pësojmë ne, duhet t’i paraprijmë momenteve të këqija që do të ketë. Përmendët të rinj, unë gjatë periudhës që kam qenë të Laçi i kam parë te Internacional, iu dha rasti Khalilit sot dhe u fut në lojë me 100% duke pasur parasysh se dy ditë më parë ka luajtur me të rinjtë në Fier. Por jam shumë i kënaqur edhe me pjesën tjetër të skuadrës, sidomos me krahët tanë.
Nuk mund të bëj shumë diferencime mes lojtarëve, dy të dëmtuarit që u futën në lojë pa bërë stërvitje të plotë, përveç të djeshmes, tregon dëshirë, tregon që këto djem kanë dëshirë që të ecin përpara. Vetë e kanë në dorë, futbollin do ua mësoj unë deri në një farë mase sa të jem këtu, se futbolli kështu e ka. U uroj suksese djemve, diferencat në kampionatin tonë janë shumë të vogla.
Tiranën të them të drejtën e kam parë në të gjithë ndeshjet që ka luajtur, qoftë me Dinamon, qoftë me ndeshjen që humbi me Erzenin. I kam parë në shumicën e ndeshjeve, nuk e prisja në këtë gjendje edhe pse skuadra ka qenë pushim. Nuk e prisja në këtë gjendje, Tirana çaloi fizikisht, problemi ishte që ne ishim shumë të disiplinuar me atë që kërkonim të bënim, se e pamë që Tirana luante me 3-4-3 dhe ne iu përshtatëm nëpërmjet problemeve teorike se nuk e kisha praktikuar shumë në stërvitje se i prisja të luanin me katër në mbrojtje”, u shpreh ndër të tjera për “MCN” pas ndeshjes trajneri i Laçit, Mirel Josa.
