Një lajm i hidhur ka ardhur sot për komunitetin e medias. Ka ndërruar jetë në një moshë të parakohshme 57 vjeçare, gazetari i mirënjohur sportiv, Saimir Demi. Një lajm i trishtë ky, padyshim për familjarët e tij, bashkëshorten, djalin dhe njerëzit e tij të afërm, por padyshim edhe për komunitetin e sportit, fushën në të cilën Saimir Demi i kushtoi tërë jeten e tij, si një nga gazetarët më të sikatur të vendit tonë.
Një lajm tronditës edhe për ne kolegët e afërt të tij, mes të cilëve bëj pjesë edhe unë personalisht, me të cilin pata fatin dhe kënaqësinë e një bashkëpunimi të afërt, fillimisht në gazetën e përditshme sportive “Sport Ekspres”, ku ai ishte një pjesë shumë e rëndësishme përkrah drejtuesit Fatmir Mëneri dhe kolegëve të tjerë të redaktisë, për të vijuar më pas edhe në Radio Televizionin Shqiptar, ku në cilësinë e Kryeredaktorit të RTSH Sport, bashkëpunimi im si korespondent i RTSH Shkodra ishte mëse i shkëlqyer. Jo vetëm një profesionist i zanatit, por mbi të gjitha një njeri model qytetarie, shumë i dashur dhe i ngrohtë në komunikim me ne gazetarët e rretheve, e veçmas për Shkodrën, që ai e donte dhe e respektonte jasht mase për traditen dhe peshën që mban në sportin shqiptar, prej së cilës kërkonte lajme të vazhdueshme.
Sëmundja e tij, që në fakt e mundoi shumë gjatë periudhës së fundit na i pakësoi komunikimet, por realisht, edhe nga spitali ku ai trajtohej, patëm rastin të komunikonim, gjithnjë me shpresen e një rikthimi në zyrën e tij për të drejtuar redaksinë e tij të RTSH Sport. Dhe, në fakt, ky rikthim erdhi, por vetëm për pak, përkohësisht, sepse sëmundja e rëndë që e mundonte i mori jeten.
Lamtumirë kolegu i nderuar, profesionisti dhe qytetari model, Saimir Demi. Respekt dhe mirënjohje për bashkëpunimin e mirëfilltë shumë vjeçar, në “Sport Ekspres” dhe RTSH. Pushofsh në paqe, miku im i kahershëm, do të na mungosh shumë!
Në emër edhe të portalit Veriu Sport, i përcjellim ngushëllimet më të sinqerta, familjes Demi për humbjen e njeriut të afërt, por në të njëjtën kohë edhe komunitetit të medias sportive, për humbjen e një figure të spikatur që kontribuoi për vite të tëra në këtë fushë.
Gaspër MARKU