Një vitë më parë u nda nga jeta një nga emrat më të spikatur të futbollit shkodran dhe atij shqiptar, ish futbollisti i Vllaznisë, Partizanit dhe kombëtares shqiptare, Ramazan Rragami. Në respekt të kësaj figure të shquar sportive, i nderuar me titullin e lartë Mjeshtër i Madh, Bashkia Shkodër, në bashkëpunim me Klubin e Futbollit Vllaznia, si dhe familja Rragami, kanë planifikuar organizimin e një aktiviteti përkujtimor për Zanin, siç thirrej në mjedisin sportiv e më gjërë.
Sipas njoftimit zyrtar të KF Vllaznia, aktiviteti në fjalë do të zhvillohet ditën e dielë të 15 janarit 2023, me një program të larmishëm. “Flasim dhe luajmë për Zanin”, quhet aktiviteti përkujtimor për Ramazan Rragamin, i cili fillon në orën 10:00 me një takim që do të zhvillohet në sallën kryesore të stadiumit “Loro Boriçi”, ku në praninë e familjarëve të tij, veteranë, kolegë dhe bashkohës të Zanit, përfaqësues nga Federata Shqiptare e Futbollit, gazetarë sportiv, si dhe tifozë të tij personal, do të sjellin kujtime nga jeta dhe karriera sportive e legjendës së futbollit shqiptar, Ramazan Rragami.
Në vijim, emocionet e ditës përkujtimore kushtuar figurës së Ramazan Rragamit do të zhvendosen në pallatin e sportit “Qazim Dervishi” të Shkodrës, aty ku me pjesëmarrjen e katër ekipeve: Gazetarët e Shkodrës, ato të Tiranës dhe Kosovës, së bashku me një ekip miks me përfaqësues të ish futbollistëve të kombëtares Shpresa që të drejtuar nga dyshja Shyqyri Rreli-Ramazan Rragami, u patën kualifikuar në tetëshen më të mirë Europiane, do të ndeshen me nga një takim në një miniturne, në garë për të fituar trofeun, “Ramazan Rragami”.
