Liridon Latifi, nuk do të jetë me skuadrën në ndeshjen e nesërme me Partizanin, takim ky i vlefshëm për javën e 25-të të Abissnet Superiore. Një gjë të tillë e ka bërë të ditur trajneri Mirel Josa gjatë konferencs për shtyp të pragndeshjes, mbajtur paraditen e sotme në mjediset e stadiumit “Loro Boriçi”.
Arsyeja, në fakt nuk ka të bëjë me gjendjen fizike, sepse Latifi ka disa javë që ka lënë pas dëmtimet duke qënë i gatshëm të jetë në fushën e lojës, gjë që është aktivizuar në ndeshjet e fundit. Por, mungesa e tij në sfidën e nesërme me Partizanin ka të bëjë me një penalizim që futbollisti ka marrë nga KF Vllaznia në lidhje me situatën e krijuar ndeshjen e kaluar në transfertën e Durrësit.
Siç është bërë me dije edhe më herët, në strategjinë që Josa kishte projektuar në ballafaqimin me Teutën, Latifi nuk ka qënë në formacionin e parë, por i është kërkuar që të aktivizohet në pjesën e dytë, por ai nuk ka qënë i gatshëm t’i përgjigjet vendimit të trajnerit.
Rasti në fjalë, është analizuar nga drejtuesit e KF Vllaznia, të cilët nuk kanë toleruar ndaj këtij veprimi, ndaj edhe kanë marrë masat e duhura. Një gjë të tillë, e ka konfirmuar në konferencën e shtypi, edhe trajneri Mirel Josa, kur i pyetur për një çështje të tillë, është shprehur:
“Po, ka një problem të tillë, dhe klubi ka marrë masa në këtë drejtim, qoftë masa financiare, dhe qoftë masa, të cilat kanë të bëjnë me aktivizimin e tij në vazhdimësi.”
Në një pyetje të dytë, nëse Latifi, do të jetë i gatshëm për nesër ndaj Partizanit, Josa, ka rikonfirmuar atë që klubi ka vendosur për të mos qënë me skuadrën në këtë ndeshje.