Zakonisht, në deklaratat e trajnerëve përpara ndeshjeve zyrtare dallohet një optimizëm dhe besim për të sfiduar kundërshtarin. Një gjë të tillë e ka edhe Migen Memelli, duke shpresuar dhe besuar se Skënderbeu do t’ua arrijë qëllimit për të marrë rezultat pozitiv ndaj Vllaznisë. Megjithatë, prononcimi i tij gjatë konferencës për shtyp dhënë 24 orë përpara ndeshjes është i matur dhe me “këmbë në tokë”. Kjo, e dhe për faktin se përballë ka një Vllazni potente, e cila e ka shpalosur hapur objektivin e saj për titullin kampion. “Me cilësinë e lojës që kemi treguar, sidomos me Tiranën dhe Egnatian mendoj se mund të kishim dy pikë më tepër sot. Çdo ndeshje në këtë kampionat është jashtëzakonisht e vështirë, çdo pikë ka vlerë”. Nesër kemi përballë një kundërshtarë shumë të fortë, sigurisht që do e vlerësojmë maksimalisht sfidën. Të gjithë janë të përgatitur për të dhënë më të mirën e tyre”, thotë Memelli.
Në ndryshim bga pjesëtarë të kampit korçar, përfshirë edhe shkodranin, Belajdi Pusi që në një farë mënyre, kërkojnë fitore dhe hakmarrje ndaj Vllaznisë që i mori trofeun në finale e Kupës së Shqipërisë, Memelli duket se nuk e ka këtë frymë. “Një ndeshje finale e Kupës nuk i ngjan një ndeshje të kampionatit. Por gjithsesi ne jemi koshient për atë që kemi bërë vjet dhe djemtë kanë bërë mirë në tri ndeshje me Vllazninë, dy në kampionat dhe ajo e finales. Detajet na kanë penalizuar, por futbolli i njeh këto”, nënvizon ai.
Në mbyllje, Memelli prek edhe temën e dënimit të klubit korçar duke e konsideruar të favorshëm vendimin më të fundit UEFA-s. “Në dëshirën time, por dhe në koshiencën time, besoj që ky afati 5-vjeçarë të kalojë në një amnisti, që besoj se mund të jetë 2 vjet dhe shpresoj për këtë”, shprehet tekniku i korçarëve, Migen Memelli duke shpresuar në një tjetër vendim pro klubit korçar për ta rikthyer sa më parë skuadrën në arenën europiane.
