Risi në Shkodër. Drejtuesit e KF Vllaznia, kanë vendosur që tifozet femra që kanë dëshirë të ndjekin skuadrën e qytetit të tyre në stadiumin “Loro Boriçi” , hyrjen ta kenë falas, pa biletë.
Një vendim i tillë i marrë nga presidenti i kuqebluve, Alban Xhaferi është zyrtarizuar më herët, ndërkohë që sot, do të aplikohet për herë të parë në ndeshjen, Vllaznia-Dinamo, e vlefshme për javën e pestë të Abissnet Superiore.
Prania e elementit femër në stadiumin “Loro Boriçi” si dhe më herët kur quhej “Vojo Kushi”, ka qënë një traditë e kahershme dhe e vazhdueshme për komunitetin shkodran. Por, tashmë, në respekt të kësaj kategorie të respektuar të shoqërisë sonë, me vendimin e fundit të KF Vllaznia për favorizimin e tyre të hyrjes gratis, pritet që numri i tyre të jetë edhe më i madh.
Me këtë veprim, drejtuesit e klubit kuqeblu, besojnë se prania e elementit femër në tribunat e “Loro Boriçit” pritet të ndikojë pozitivisht edhe në uljen e tensioneve të tifozërisë që shpesh here, janë jo pak të ashpra në radhët e tyre
Ndërkohë, referuar takimit të sotëm, shumë të rëndësishëm për kuqeblutë, shpresohet se prania sa më e madhe e elementit femër në stadium, të ndikojë pozivisht për skuadrën shkodrane, duke qënë fatsjellëse për një rezultat pozitiv të Vllaznisë.
