Mehdi Çoba konsiderohet “heroi” i mbrëmjes së sotme, pasi goli i tij në minutën e 90-të shënuar në portën e Rexhepit të Partizanit i dha fitoren kuqebluve. Një gol që ndezi tifozërinë shkodrane e pranishme në tribunën e stadiumit “Partizani”. Një gol që patjetër që do të mbahet mend gjatë edhe nga vetë Çoba, për të cilin ai ka një deditim, pikërisht për gjyshin e tij të ndjerë, i cili ka luajtur futboll me Vllazninë.
Duke folur pas ndeshjes në mikrofonin e Over Sport, Çoba shprehet i kënaqur dhe i emocionuar, aq më shumë që goli i tij id ha fitoren ekipit.
“Jam shumë i kënaqur, por më i kënaqur që ekipi mori fitoren dhe u ngjit në renditje. E fillova ndeshjen me vështirë dhe mbas golit u lirova. Ishte fushë e re për ne dhe nuk ishim ambientuar me të. Dedikimi? Goli i dedikohet gjyshit tim të ndjerë dhe shpresoj të jetë krenar për mua. Sa më shpejt që të jetë e mundur, me punë dhe këmbëngulje do të mund të fitoj një vend titullar në skuadër. Stërvitem çdo ditë dhe pres momentin tim. I takon trajnerit që të vendosë se kush do të luajë në fushë”, u shpreh ndër të tjera, autori i golit të fitores, Mehdi Çoba.
