Java e fundit e fazës së dytë të Kampionatit Kombëtar për Superligën e volejbollit femra, ka përballur Vllazninë me Barleti Volej. Dy skuadra këto që gjatë këtij sezoni kanë spikatur për rivalitetin dhe konkurencën e vendit të katërt, pozicion ky që të çon në Play-Off. Një objektiv që edhe pse është mundur nga Barleti, Vllaznia ka arritur ta realizojë duke vijuar ta mbajë atë pozicion.
Referuar ecurisë së takimit të luajtur mbrëmjen e së premtes në kryeqytet, seti i parë ka qënë më i bukuri i krejt ndeshjes. Kjo, pasi publiku i pranishëm arriti të shijojë një duel mjaft emocionues i denjë për t’u fituar nga të dyja skuadrat, por që në fund, me vetëm dy pikë diference ka triumfuar Barleti me rezultatin 25-23.
Në setin e dytë, pritej një reagim i Vllaznisë, por skuadra e drejtuar nga trajneri Dorjan Tafa ka befasuar me rënien e theksuar të lojës në dy setet në vazhdim, të cilat i humb me të njëjtën kuotë pikësh, 25 me 15, duke bërë që i gjithë takimi të mbyllet me fitoren e pastër, 3 me 0 nga Barleti Volej.
Edhe pse ka fituar, Barleti nuk arriti të kapte Vllazninë në renditje, sepse skuadra kuqeblu ka 21 pikë në tabelën e klasifikimit duke qënë në vendin e katërt të tabelës së klasifikimit dhe brenda objektivit të fazës finale, Play-Off, ndërkohë që Barleti Volej mbetet në vendin e pestë.
