Partizani-Vllaznia 81-66
(20-20, 10-11, 26-18, 25-17)
Vllaznia në basketboll për femra ka qënë mysafire në kryeqytet duke u ndeshur me Partizanin, skuadër e cila vetëm pak ditë më parë u bë fituese e trofeut të Ligës Unike, Shqipëri-Kosovë. Ndonëse përballë një kundërshtari të tillë me nivel, basketbollistet shkodrane të drejtuara nga trajneri Bledar Gjeçaj bënë një paraqitje dinjitoze në pjesën e parë.
Ndeshja e luajtur në pallatin e sportit “Asllan Rusi” të Tiranës për llogari të javës së 14-të, ka prezantuar një pjesë të parë me shumë rivalitet. Perioda e parë mbyllet me rezultatin e barabartë 20 me 20. Rivaliteti vijon edhe në periodën e dytë, e cila mbyllet me fitoren e Vllaznisë me rezultatin 10 me 11.
Por, ajo që bën diferencën është pjesa e dytë, ku Partizani me element me përvojë, perfshirë edhe lojtare të huaja, përballë një Vllaznie me vajza të reja, del fituese e dy periodave. 26 me 18 fiton të tretën si dhe 25 me 17 të katërtën duke u bërë fitues it ë gjithë ndeshjes me rezultatin e përgjithshëm 81 me 66.
Humbja në kryeqytet, nuk ka prishur raportet e klasifikimit të Vllaznisë, e cila vazhdon të mbajë vendin e katërt në renditje, pozicion që përkon me realizimin e objektivit për këtë sezon sportiv.
