Egnatia dhe Tirana kanë barazuar 1-1, në ndeshjen e vlefshme për javën e 30-të të Superiores. Trajneri i rrogozhinasve Edlir Tetova doli në prononcim për “RTSH Sport” në fund të takimit.
“Çdo trajner e do grupin e plotë, që të ketë mundësi të operojë gjatë ndeshjes. Kishim një pjesë të parë jo të mirë. Si Lushkja dhe Ujka ishin të nxituar, zbrisnin shumë shpejt për të marrë topin dhe kjo i dha avantazhin Tiranës, që t’i kishte nën kontroll të dy mesfushorët tanë. Në pjesën e dytë, edhe kur ngelëm me 10 lojtarë, e kemi dominuar lojën edhe me raste, por pa arritur të gjejmë rrugën e golin.
Janë disa faktorë, që nuk duhet të bëhemi sebep që të fitojë dikush tjetër. Në qoftë se ndalon ekipin me kartona të kalueshëm, nuk e di çfarë bukurie mund të ketë kjo atmosferë me tifoza, për ta quajtur lojë futbolli.
Në momentin që një skuadër rri pret Egnatian, duhet të krijohen mundësi tjera për rrugëdalje. Pjesën e dytë e rregulluam. Ishim superior përpara portës kundërshtare. Në pjesën e parë, lojtarët duhet të ishin më të kthjellët në zbritjen për të marrë topin.
Sot ishte një dëshirë shumë e madhe e për ta fituar ndeshjen nga ana e lojtarëve. Duhet të kemi vazhdimësi dhe orientim të saktë për mbrojtjen e titullit. Bakajoko në pjesën e parë nuk ka kapur asnjë top, por nuk është faji i tij, ai i ka bërë lëvizjet”, deklaroi Tetova.