Nuk është objektivi i denjë për një skuadër kampione në dalje, por është ekzaktësisht ai që i duhej Teutës: 3-1 në sfidën direkte me Egnatian vlen sigurinë e qendrimit në Superiore, duke evituar matematikisht zonën playout, në të cilën tani duhet të reflektojë fort Ramadani, që bashkë me lojtarët e tij gaboi krejtësisht ndeshjen dhe madje e kompromentoi përpara se të kishte mundësinë të bënte lëvizjet e tij. Meritë ndoshta edhe e Arapit që përzjeu kartat me pankinën për Hykën e Lorenco Vilën, duke u imponuar me Dacin e Hebajn.
Fakt është se në tre minuta mes të 10 e 13, kur ende nuk ishte regjistruar goditja e parë në portë, Teuta shënoi një dygolësh të tmerrshëm, që e bëri Egnatian ta lëshonte zemra e humbi një 11 metërsh. Beqja korigjoi me kokë në rrjetë krosimin e Kotobellit, ndërsa Hebaj dështoi të dyfishonte në minutën e 12, duke u hiponotizuar nga Puja që priti penalltinë, sa për të shtyrë takimin me nxjerrjen e topit nga rrjeta, sepse 60 sekonda më pas Daci nuk ishte kaq i sjellëshëm me portierin rrogozhinas, duke siguruar rezultatin në 2-0.
Shumë, por mund të kishte qenë më keq nëse Xhekson do kishte shënjestër më të mirë, gjë që e bëri Ramadanin të ndryshojë në mënyrë të paprecedentë me një lëvizje të dyfishtë pas vetëm 25 minutash lojë: Ademi dhe Imeri morën vendin e Lilës dhe Shytit në një konfirmim se ose trajneri kishte bërë zgjedhjet e gabuara, ose lojtarët e tij kishin gabuar ndeshjen. Reagimi i vetëm i ardhur ishte goli i anulluar në minutën e 31-të për pozicion jashtë loje i Delarzh, shumë pak për të menduar të përmbysje rezultatin në Niko Dovana.
Në dhomat e zhveshjes mbeti edhe njeriu simbol i Egnatias, Pedro Augusto, në vend të tij Magani, por është akoma Teuta që sulmon e miqtë që, pa mundur të krijojnë asgjë, vetëm mbrohen. Ky sistem nuk mund të mos sillte golin e tretë të Teutës me Peposhin, që i shërbyer nga Hebaj, kaloi mbrojtësin në markaturë përpara se të thyente edhe njëherë Pujën. Misioni i përmbushur dhe tentativat e Egnatias për ta rihapur ndeshjen nuk impresionojnë veçanërisht vendasit, të fortë në avantazhin e krijuar.
E megjithatë Arapi duhet të ketë ndonjë rezervë për interpretimin e 15 minutave të fundit në të cilat rrogozhinasit goditën traversën me Xhekson në të 76’ e shënuan golin e nderit në minutën e parë shtesë me Maganin, që gjithësesi nuk e zhbën faktin se durrsakët siguruan matematikën shpëtimtare në fund të një sezoni plot probleme, ndërsa rrogozhinasit duhet të qartësojnë idetë pas humbjes së tretë radhazi.