Në kampin bardheblu nuk kanë mëshirë për askënd. Me ndeshjet dhe fitoret që po realizon nga javë në javë po tregon se është një skuadër pa kompromis. Një gjë të tillë e bëri në Korçë dhe të njëjtën gjë e përsëriti edhe sot në Rrogozhinë, teksa e mundi Egnatian në shtëpinë e saj me rezultatin 0-3.
Realizimi i Xhixhës që në frymën e parë të ndeshjes së Rrogozhinës i çliroi këmbët e bardhebluve për të regjistruar ndeshjen e tetë rresht pa humbje, ndërsa në krahun tjetër, kjo ishte një disfatë pa shumë dhimbje për Egnatian që në këtë sfidë hoqi dorë nga bomberi Pedro Augusto për shkak kartonësh. I mjaftuan pak më shumë se 60 sekonda Redon Xhixhës për të shtangur Pujën me një të djathtë kirurgjikale ku numri 1 i portës rrogozhinase nuk mund të bënte më shumë.
Shok total për skuadrën e Ramadanit që nuk arriti të reagonte menjëherë por gjithsesi e mbylli pjesën e parë në disavantazhin minimal, pavarësisht disa tentativave të vakëta nga të dyja kampet. Për bardheblutë, Xhixha dhe Ismajlgeci u shfaqën ngacmues ndërsa në krahun tjetër, Demir Imeri por edhe Jackson ishin shumë pak për të shqetësuar Visar Bekajn që kontrolloi zonën e tij pa telashe të mëdha.
Rikthimi në fushën e lojës nuk ndryshoi asgjë në peshoren e ndeshjes pasi tentativa e Imerit u pasua nga një tjetër gol por në portën e kundërt. Hoxhallari nuk e fali Pujën duke sigluar rrjetën e qetësisë për bardheblutë me një gol që erdhi direkt nga goditja e këndit. Më pas ishte radha e Najdovskit për të shënuar edhe të tretin.
Shumë e brishtë mbrojtja e Egnatias për t’i bërë ballë Tiranës që nuk u ndal për asnjë moment duke dhuruar një tjetër paraqitje për t’u vendosur në kornizë. 19 pikë diferencë nga Laçi ndjekës, titulli është shumë pranë, vetëm çështje ditësh.
