Vllaznia-Studenti 61-43 (10-5, 11-16, 24-10, 16-12)
Formacioni i Vllaznisë: Ingrit Dashja, Anisa Bokrina, Melida Hykaj, Bernada Reshpja(C), Sindi Kryeziu, Isra Dibra, Medina Hykaj, Anisa Musaja, Sara Murçaj. Trajnere: Medina Mustafa
Katër ndeshje, tre fitore. Ky është bilanci për Vllazninë e basketbollit për femra, skuadër e cila e drejtuar nga trajnerja Medina Mustafa po bën një paraqitje shumë të mirë në kampionat. Fitorja e radhës është realizuar pasditen e së shtunës në pallatin e sportit “Qazim Dervishi” të qytetit të Shkodrës duke pasur përballë Studentin e Tiranës.
Formacioni kuqeblu i dirigjuar nga kapitenia Bernada Reshpja, më e mira në fushën e lojës me 19 pikë të shënuara, e nisi mjaft mirë ndeshjen, teksa perioden e parë e mbylli me rezultatin 10 me 5 në favor të saj.
Mikeshat nga Tirana e përmirësojnë në mënyrë të ndjeshme lojën e tyre, aq sa në periodën e dytë rikuperojnë shumë duke e fituar atë me shifrat 11-16. Në këtë mënyrë, të dyja skuadrat shkojnë në dhomat e zhveshjes për pushimin mes dy pjesëve me shifrat e barabarta, 21 me 21.
Me rikthimin në fushën e lojës, trajnerja Medina Mustafa bën lëvizjet e duhura, dhe skuadra i përgjigjet në mënyrën më të mirë duke e fituar periodën e tretë me shifrat e thella 24 me 10 duke e çuar avantazhin e përgjithshëm në 45 me 31.
Dhjetëminutëshi i fundit i periodës së katërt administrohet në mënyrën më të mirë nga skuadra kuqeblu, e cila jo vetëm që mban në fuqi avantazhin në favorin e saj, por duke e fituar edhe periodën e katërt me shifrat 16 me 12, e thellon edhe më shumë diferencen, e cila në përfundim të minutës së 40-të është me 18 pikë diferencë(61-43).
Një fitore kjo që krahas kapitenes Bernada Reshja me 19 pikë të shënuara, ka kontributin edhe të basketbollisteve të tjera: Melida Hykaj 17, Anisa Bokrina 13, Ingrit Dashja 8, Anisa Musaja 2, Sindi Kryeziu 2 pike. Nga të dhënat teknike, zotërimi i topave në tabelë, Rreshpja është me 11-të topa, e ndjekur nga Dashja dhe Bokrina me nga 10-të.
Për javën e pestë, Vllaznia e basketbollit femra do të jetë mysafire në kryeqytet, ku sipas kalendarit të Federatës Shqiptare të Basketbollit, do të ndeshjet me ekipin e Partizanit.
(Video) Pamje nga ndeshja e basketbollit femra, Vllaznia-Studenti e fituar nga skuadra kuqeblu me rezultatin 61-43.
