Vetëm në fund të konferencën për shtyp dhe pas pyetjes së gazetarëve, trajneri i Vllaznisë Brdariç ka thënë se ne duam të fitojmë dhe shkojmë për tre pikë në Korçë.
Përpara ndeshjes me Skënderbeun, timonieri kuqeblu është treguar mjaft i ekuilibruar në deklarata.
“Po përgatitemi për këtë sfidë të fortë që kemi në Korçë. Është ndeshja e tretë brenda kësaj jave dhe ne e dimë që kushtet atje do të jenë pak më të vështira. Na duhet një anë psikologjike sa më e fortë, të jemi sa më mirë fizikisht dhe të përgatitur. Skenderbeu është një ekip mjaft i mirë fizikisht, një miks mes lojtarëve të rinj dhe me eksperiencë. Duhet të jemi sa më të vëmendshëm që nga minuta e parë. Kurrë nuk nënvleftësojmë asnjë ekip. Këtë sezon kemi luajtur dy herë me Skenderbeun, e dimë cilat janë armët e forta te tyre. Ne duhet të shfrytëzojmë pikat e dobëta të tyre. Sot kemi një stërvitje dhe të punojmë për këtë ndeshje”, – u shpreh Brdariç.
Qato do të mungojë në Korçë, ka thënë Brdaric, teksa ka kujtuar se mungesat po i vuanim disa javë më përpara.
“Nuk kishim gjithë ekipin të gatshëm. Por kemi shumë lojtarë që kanë dëshirë të luajnë. Duhet të besojmë në çdo moment se ne mund ta fitojmë ndeshjen”.
Lidhur me bllokimin e merkatos së Vllaznisë nga FIFA, ai ka thënë se jemi duke diskutuar disa çështje, por i përkasin një niveli tjetër. Akoma nuk është e qartë se çfarë është duke ndodhur. Shpresojmë që të mund ta zgjidhim sa më shpejt.
Në lidhje me dështimin e afrimit të brazilianit Da Silva, Brdaric ka qenë i qartë. “Duhet të pyesni vetë Da Silvën se çfarë ndodhi. Është i vetmi që mund të pyesni çfarë shkoi keq. Mirëpresim lojtarë që mund të vijnë, që mund të bëjnë diferencën në fushë. Në rastin konkret, duhet të pyesni atë”,- ka shtuar ai.
(Video) Prononcimin e plotë të trajnerit Tomas Brdariç, në prag të ndeshjues me Skënderbeun, mund ta ndiqni në kanalin tonë zyrtar, Veriu Sport-YOUTUBE
