Edhe pse në kalendarin e javës së tetë kategorisë Superiore, Vllaznia është pritëse për t’u ndeshur me Tiranën, siç është thënë edhe më herët për arsye të punimeve në tapetin e fushës së stadiumit “Loro Boriçi”, kjo ndeshje është spostuar të luhet në stadiumin “Kukës Arena”.
Megjithatë, kuqeblutë pritet ta ndjejnë veten si në shtëpinë e tyre, dhe kjo falë vendimit të presidentit të KF Vllaznia, Alban Xhaferi për të vendosur autobusë falas pa limit për tifozërinë shkodrane në udhëtimin drejt qytetit të Kukësit.
Veriu Sport, ishte i pranishëm në sheshin përpara Teatrit Migjeni, aty klubi Vllaznia kishte informuar zyrtarisht për nisjen e autobusëve dhe filmoi një pjesë të atmosferës së nisjes së tifozëve shkodranë drejt Kukësit.
Nga sa bëhet e ditur, përpos udhëtimit në grup me autobusë, një pjesë e madhe e tifozëve janë nisur edhe me mjetë të tjera private, autovetura dhe furgonë, duke krijuar kështu komoditetin e një tifozërie të madhe në numër në “Kukës Arena” në mbështetje të skuadrës së tyre të zemrës.
Entuziasmi dhe besimi i tyre për të marrë një rezultat pozitiv në këtë ndeshje është i madh, gjë që nuk nguruan ta shprehin publikisht edhe gjatë regjistrimit të videos tonë.
Suksese Vllaznia, kthim me fitore nga Kukësi!
