Kuqeblutë e Vllaznisë kanë lënë sot në orët e para të mëngjesit Shkodrës për të udhëtuar drejt Letonisë, aty ku të enjten, ora 17:00, do të luhet sfida e kthimit të turit të parë, e vlefshme për UEFA Conferencë Liague.
Përballë Vllaznisë do të jetë skuadra letoneze, Daugavpils, e cila në sfidën e parë të luajtur në “Elbasan Arena” fitoi me rezultatin 0 me 1.
Në kontaktin që Veriu Sport, pati me futbollistë dhe pjesëtarë të stafit teknik të kuqebluve, dallohej qartë optimizmi i tyre për ta përmbysur disavantazhin e ndeshjes së parë.
Optimizëm për përmbysjen e rezultatit shfaqi edhe drejtori sportiv i KF Vllaznia, Vioresin Sinani, i cili në prononcimin e tij thekson se situata në skuadër gjatë ditëve të pasndeshjes së parë në Elbasan, ka qënë mjaft e mirë duke konfirmuar edhe përmirësimin e infermierisë.
Ndërkohë, pas disa testimeve gjatë dy-tre ditëve të fundit në ndeshjet e kontrollit brenda familjes kuqeblu, tekniku Edi Martini ka gati edhe emrat me të cilët do ta nisë nga minuta e parë.
Pas udhëtimit nga Shkodra me autobus drejt Aeroportit “Nënë Tereza” të Rinasit, skuadra kuqeblu ka fluturojnë me avion, fillimisht drejt Austrisë dhe më pas për në Riga të Letonisë në pritje të pasdites së enjte për sfidën zyrtare të orës 17:00.
Nga sa mësohet, një grup i dytë i delegacionit kuqeblu, në përbërje të cilit janë edhe pjesëtarët e presidencës së KF Vllaznia, do të udhëtojë mëngjesin e së mërkurës, për t’iu bashkuar skuadrës në Riga të Letonisë.
(Video) Prononcimin e plotë të drejtori sportiv të KF Vllaznia, Vioresin Sinani dhe pamje nga nisja e skuadrës kuqeblu nga Shkodra, mund t’i ndiqni në kanalin tonë zyrtar, Veriu Sport-YOUTUBE.
Gaspër MARKU
