Vllaznia-Pogradeci 3-2(25-15, 17-25, 25-19, 23-25, 15-10)
Vllaznisë dhe Pogradecit në volejboll për femra i është dashur të luajnë 5 sete për të përcaktuar skuadrën fituese. Ajo është Vllaznia, e cila pas rivalitetit dhe emocioneve që nuk munguan të jenë të pranishme nga seti i parë deri tek i pesti, në fund ka nxjerrë fituese skuadrën kuqeblu me rezultatin 3 me 2.
Ndeshja e luajtur pasditen e së premtes në pallatin e sportit “Qazim Dervishi” të Shkodrës ka pasur një të veçantë, e cila lidhej me rikthimin e trajneres Nora Deda në drejtimin e Vllaznisë, prej së cilës rreth tre javë më parë kishte dhënë dorëheqjen për shkak të një humbje në shtëpi jo shumë bindëse përballë ekipit durrsak Teuta.
Këmbënguljes së zyrës së sportit pranë Bashkisë Shkodër duke bindur trajneren Nora Deda të rikthehej në krye të skuadrës, skuadra kuqeblu iu përgjigj mjaft mirë duke zhvilluar një ndeshje plotë mobilizim dhe këmbëngulje për fitore.
Me kapitenen Klodeta Zhivani në krye, Vllaznia fiton setin e parë me shifrat 25-15, por hum të dytin 17-25 duke bërë që rezultati të barazohej në 1-1. Skuadra kuqeblu kalon në avantazh duke fituar setin e tretë 25-15, ndërkohë që është shumë pranë fitores së setit të katërt për ta mbyllur të gjithë ndeshjen e avantazhin e seteve 3-1.
Por, një gjë të tillë nuk ia lejon ekipi pogradecar, i cili i drejtuar nga ish volejbollisti dhe ish trajneri i Vllaznisë, Besnik Lisha, fiton ngushtë setin e katërt me shifrat 23-25 duke bërë që fati i kësaj ndeshje të vendosej me set final.
15 me 10 në favor të Vllaznisë mbyllet ky set duke fiksuar rezultatin e përgjithshëm me sete, 3 me 2 për skuadrën kuqeblu. Një fitore kjo e rëndësishme për Vllazninë, e para në kompeticionin e Kupës së Shqipërisë pas humbjes në javën e parë me Partizanin duke hapur rrugën e pretendimit të kualifikimit në grup.
