Vllaznia-Apolonia 4-0
(Shënues: Berisha, Franja, Doçi, Lufo)
Ndeshja më e rëndësishme e Javës së 16-të të Kampionatit Kombëtar të Futbollit për femra, ishte ajo e zhvilluar në Shkodër, në mes Vllaznisë kampione në fuqi dhe Apolonisë nënkampione në fuqi. Dy skuadra që edhe në këtë edicion rivalizojnë për fitimin e trofeut duke qënë sërishmi në të njëjtat pozita, Vllaznia e para dhe Apolonia e dytë.
Futbollistet kuqeblu të drejtuar nga trajneri i tyre Nikolin Leka ishin dominuese gjatë të gjithë ndeshjes duke fituan pastër me rezultatin e thellë 4-0. Një ndeshje kjo e zhvilluar në stadiumin “Reshit Rusi” që në fakt nuk e vunë për asnjë çast në diskutim marrjen e tre pikëve, pikë të cilat duhet thënë se janë përcaktuese për fatin e titullit kampion.
Pjesa e parë e kësaj ndeshje u mbyll me rezultain 1-0 për skuadrën kuqeblu me gol të shënuar në minutën e 28-të nga Berisha. Ndërkohë, në 45 minutat e pjesës së dytë, Vllanzia gjen edhe tre herë të tjera rrugën e rrjetës me autore, kapitenin Franja, Doçin dhe Lufon.
Me tre pikët e marra në këtë ndeshje, Vllaznia shkon në kuotën e 40 pikëve duke iu shkëputur rivales kryesore Apolonia me 5 pikë më shumë, që do të thotë se titulli kampion edhe për këtë edicion është shumë pranë skuadrës kuqeblu.
(Video: Pamje nga ndeshja dhe golat e shënuar në ndeshjen, Vllaznia-Apolonia 4-0)
