Vllaznia e Shkodrës për kategorinë e Superligës U-17 është shpallur kampione e Shqipërisë për sezonin 2022/2023. Titulli në fakt është siguruar dy javë më herët, por sot, pas ndeshjes së fundit është zyrtarizuar si kampione e Shqipërisë.
Sfida e sotme për kuqeblutë është luajtur në stadiumin “Loro Boriçi” përballë ekipit FC Internacional dhe është fituar nga Vllaznia me rezultatin 5 me 2. Autorët e golave për skuadrën kuqeblu që drejtohet nga trajnerët Gilman Lika dhe Denis Zmijani, ishin Kubazi 3, përkatësisht në minutat 70’, 81’, 84’ ndërkohë që humbi edhe një penallti në minutën e 88-të, ndërkohë që dy golat e tjerë të Vllaznisë u shënuan nga Likaj 40’ dhe Hajdari 50’. Për skuadrën e Internacional, autorë të golave janë Cani në të 45-tën dhe Bushati në të 57-tën.
Në këtë mënyrë, skuadra shkodrane U-17 u rendit në vendin e parë të kampionatit pasi në 27 javë arriti të grumbullojë 38 pikë.
Në përfundim të ndeshjes u zhvillua edhe ceremonia festive e rastit nga FSHF me ish-futbollistin e njohur të Vllaznisë dhe Kombëtares, Hysen Zmijani, i cili u dorëzoi futbollistëve kuqeblu trofeun e kampionit dhe medaljet.
(Video) Pamje nga ndeshja Vllaznia U17-Internacional U17, 5-2. Vllanzia shpallet kampione.
Gaspër MARKU
