Vllaznia – Dinamo City është takimi i parë gjysmëfinal i Kupës së Shqipërisë, i cili do të luhet sot në stadiumin “Loro Boriçi” duke nisur nga ora 19:00. Dy skuadra që janë shumë pranë sigurimit të fazës “Final 4” në “Abissnet Superiore” kanë si objektiv edhe finalen e Kupës së Shqipërisë.
Të dyja ekipet vijnë në këtë sfidë pas ndeshjeve jo të mira në kampionat, Dinamo pas humbjes 4-1 në Korçë me Skënderbeun dhe Vllaznia me barazimin 0-0 në shtëpi me Teutën. Por, sot është krejt ndryshe, sepse janë 90-të minutat e para të gjysmëfinales së parë ku hidhet hapi i parë drejt finales së madhe duke hapur mundësinë e fitimit të trofeut.
Ndërkohë, nesër(të enjten) në orën 19:00, do të luhet ndeshja e dytë gjysmëfinale, Egnatia – Partizani. Në “Egnatia Arena”, rrogozhinasit, që janë fituesit në fuqi të këtij kompeticioni, do të kërkojnë të sigurojnë një tjetër finale. Kampionët në fuqi vijnë më të qetë në këtë sfidë, pasi në kampionat kryesojnë renditjen dhe kanë siguruar edhe pjesëmarrjen në “Final 4”.
Në anën tjetër, Partizani, pas një ecurie negative, u rikthye te fitorja ndaj Laçit në “Abissnet Superiore”. “Demat” janë në vendin e katërt, një nga skuadrat pretendente për të siguruar “Final 4”, por nga ana tjetër, kanë si objektiv arritjen e finales së Kupës së Shqipërisë, që për kryeqytetasit mungon që prej vitit 2004.
Kupa e Shqipërisë, takimmet e para gjysmëfinale
Sot(2 prill)
Vllaznia-Dinamo 19:00
Nesër(3 Prill)
Egnatia-Partizani 19:00