Me dy humbje të ndeshjeve të turit të dytë, 0 me 2 një javë më parë në Shkodër dhe 1 me 0 sonte në Torino, Vllaznia e futbollit të femrave është eleminuar nga gara e mëtejshme e Ligës së Kampioneve të Europës.
Futbollistet kuqeblu të drejtuara nga Nikolin Leka bënë më të mirën e tyre në të dy sfidat, por përballë një kundërshtari të tillë që bën diferencen në cilësi, por edhe financim, nuk patën forcë të shkonin më tej.
Humbja e ndeshjes së parë në “Loro Boriçi” me rezultatin 0-2 duke mos pasur mundësi të shënonte të paktën një gol që do ta bënte më integruese sfidën e kthimit, ishte penalizimi më i madh i Vllaznisë në këtë duel me italianet e Juventusit.
Sidoqoftë, skuadra e Nikolin Lekës kërkoi ta provonte mundësinë e një surprize në Torino, dhe kjo u pa qarë që në veprimet e para të ndeshjes, kur Vllaznia e filloi ndeshjen me pressing në portën vendase. Presion që në një farë mënyre e vuri në vështirë prapavijën juventine, por përvoja, kualiteti i skuadrës në tërësi, përfshirë edhe individualitetet brenda formacionit i dhanë mundësi Juventusit që dalngadalë të marrë në dorë frenat e lojës.
Shënimi i golit në minutën e 33-të nga Straskova e çon rezultatin e përgjithshëm në 3 me 0 në favor të Juventusit, rezultat me të cilin mbyllet pjesa e parë. Me rikthimin në fushën e lojës për 45 minutat e dyta të kësaj sfide, Vllaznia kërkon të japë gjithçka në fushën e lojës në kërkim të shënimit të një goli, dhe realisht për shumë minuta luan si e barabartë.
Nga ana tjetër, Juventusi, jo vetëm që e administron në mënyrën më të mirë avantazhin, aq sa i duhej për të mbajtur nën kontroll ndeshjen, por është krejt afër edhe një goli të katërt teksa pengesë bëhet shtylla horizontale e Vllaznisë që e kthen topin në lojë.
Përfundimisht, me rezultatin e përgjithshëm 3 me 0(1 me 0 ndeshja e dytë në Torino dhe 0-2 ajo e një jave më parë në “Loro Boriçi”), Juventus kalon në turin tjetër duke vijuar konkurimin në grupet e Champions League, ndërkohë që Vllaznia duhet thënë me plot gojën se largohet nga kompeticioni Europian me “kokën lart”, jo vetëm për atë që shfaqi në përballjet e dyfishta me Juventusin, por edhe për atë, se ashtu si edhe dy sezone më parë, është mes 32 skuadrave më të mira të kontinentit europian.