Kuqeblutë e drejtuar nga trajneri Mirel Josa, kanë zhvilluar sot seancën e fundit stërvitore në prag të ndeshjes zyrtare në mes Vllaznisë dhe Kukësit. Përpara fillimit të seancës, trajneri Mirel Josa dhe mbrojtësi Ersin Hakaj ishin në sallën e konferencave të shtypit duke folur për pragndeshjen në fjalë.
Ndonëse mes dy skuadrave ka diferenca në renditje, Vllaznia e katërta në renditje me 28 pikë dhe Kukësi i teti me 22 pikë, Josa vlerëson kundërshtarin.
Në vijim Josa, foli edhe për orarin e ndeshjes, i cili ishte planifikuar të luhej në orën 19:00, ku falë temperaturave të ulta, nuk është fort komode. Duke komentuar këtë fakt, personalisht, Josa, tha se nuk i kishte pëlqyer fare orari, pasi ulja e ndjeshme e temperaturave, nuk është në favor të zhvillimit të kësaj ndeshje.
Megjithatë, për Josën, orari është i njëjtë për të dyja skuadrat, dhe do të mundohen të bëjnë më të mirën në këtë ndeshje.
Ndërkohë, reagimi i teknikut Josa për orarin e pafavorshëm të zhvillimit të ndeshjes është mbështetur nga drejtuesit e klubit kuqeblu, të cilët janë vënë në lëvizje.
Kështu, me kërkesën e KF Vllaznia, dhe në mirëkuptim me FSHF-në dhe klubin kuksian, është vendosur që orari i ndeshjes, Vllaznia-Kukësi të ndryshojë. Që do të thotë, se vendimi më i fundit marrë nga FSHF, është që nga ora 19:00, ndeshja në fjalë të afrohet në 16:00.
Vendimin në fjalë e konfirmon zyrtarisht edhe KF Vllaznia, përmes njoftimit në fjalë:
Të nderuar sportdashës!
Ju njoftojmë se për shkak të temperaturave të ulëta, në mirëkuptim edhe me FSHF-në dhe klubin e Kukësit, është vendosur që të ndryshojë orari i ndeshjes së nesërme, nga ora 19.00 siç ka qenë planifikuar më përpara, ajo do të nisë në orën 16.00.
Faleminderit për mirëkuptimin!
