Klubi shkodran, përmes një postimi në rrjetet sociale, konfirmoi bashkëpunimin me ishfutbollistin për edicionin e ardhshëm, duke lënë të nënkuptohet se palët kanë firmosur kontratë 1-vjeçare. Në këtë mënyrë, 50-vjeçari rikthehet të drejtojë sërish në Kategorinë Superiore, pas një aventure të shkurtër në Ligën e Parë të Kosovës me ekipin e Trepçës.
RIKTHIM – Ish-fantazisti kthehet të ulet në stolin e Vllaznisë për herë të dytë në karrierën e tij. Martini më parë i ka drejtuar kuqeblutë në sezonin 2009-2010. Një rikthim pas 15 vitesh në shtëpi për shkodranin, tek i cili drejtuesit e Vllaznisë shohin njeriun e duhur që mund t’i udhëheqë drejt titullit kampion, që mungon prej 24 vitesh në klub. Në këtë edicion të fundit i shkuan shumë pranë, por në finale u dorëzuan pa kushte ndaj Egnatias, duke u mposhtur me shifrat 4-0.
REVOLUCION – Siç mësohet, skuadra e re do të ndërtohet dhe riformatohet sipas ideve të ish-trajnerit të Teutës. Pranë klubit mësohet se puna do të fillojë shumë shpejt për një Vllazni të fortë në Ligën e Konferencës dhe sërish pretendente për titullin në edicionin 2025-2026. Së fundmi u njoftua largimi i Amir Kahrimanoviç, teksa kroati pritet të pasohet edhe nga disa të tjerë që nuk kanë arritur të përmbushin pritshmëritë e klubit. Afrimet e bëra në merkaton e verës dhe në muajin janar nga klubi kanë bindur shumë pak dhe klubi do të kërkojë të ulë shpenzimet me largimet e tyre, për t’i hapur rrugën të tjera prurjeve. Më shumë mundësi tregu i huaj do të jetë epiqendër, duke qenë se edhe limiti i të huajve është hequr dhe lejohet të aktivizohen edhe 11 në të njëjtën kohë.
KARRIERA – Edi Martini e ka nisur karrierën si trajner pikërisht te Vllaznia në sezonin 2009-2010. Në atë kohë ai e drejtonte ekipin kuqeblu në vetëm 16 ndeshje, duke regjistruar 8 fitore, 3 barazime dhe 3 humbje, mes tyre edhe një finale të Kupës kundër Besës së Kavajës. Më pas ai nisi serinë e emërimeve te Teuta, të cilën e mori në sezonin 2010-2011 dhe e drejtoi në 33 ndeshje.
Dy sezone më vonë ai regjistroi një eksperiencë të shkurtër me Luftëtarin e Gjirokastrës. Pati një pauzë të gjatë sa i përket trajningut dhe më pas e gjithë karriera e tij u lidh me Teutën, duke u emëruar dhe duke u larguar katër herë nga 2019-ta deri në sezonin që shkoi. Te blutë e Durrësit, Martini pati edhe kulmin e tij si trajner, duke arritur të fitojë çdo trofe të mundshëm. Mbetet të shihet se sa do t’ia dalë te Vllaznia.
Endri ÇINARI