Stadiumi “Loro Boriçi” i Shkodrës pret këtë të shtunë ndeshjen e fundit për sezonin futbollistik, 2021-2022. Bëhet fjalë për ndeshjen, Vllaznia-Egnatia, java e 35-të për kategorinë Abissnet Superiore, të cilët kuqeblutë do ta luajnë në fushën e tyre me praninë e tifozërisë shkodrane.
Në fakt, Vllaznia-Egnatia, është ndeshja e parafundit e Kampionatit Kombëtar të futbollit, ndërkohë që për t’u mbyllur gjithë sezoni futbollistik duhen për tu luajtur edhe dy ndeshje, ajo e javës së 36-të që përkon me javën e fundit të kampionatit që kuqeblutë e luajnë në transfertë me Kastriotin, si dhe finalja e Kupës së Shqipërisë, Vllaznia-Laçi, që luhet me datë 31 maj.
Por, kjo e kësaj fundjave në “Loro Boriçi”, e cila nis nga ora 17:00, është e fundit e këtij sezoni aktual që Vllaznia e luan në “Loro Boriçi”.
Në prag të kësaj ndeshje, jo pak të rëndësishme për fatin e zonës Europiane për kuqeblutë, Klubi Vllaznia, bën të ditur përmes një njoftimi zyrtar, se shitja e biletave fillon që prej mëngjesit të ditës së premte.
NJOFTIM
Duke filluar nga nesër (e premte), nis shitja e biletave të ndeshjes së javës të 35-të të “Abissnet Superiore”, Vllaznia- Egnatia që do të luhet të shtunën në ora 17.00 në stadiumin “Loro Boriçi”. Biletat mund t’i blini në sportelet pranë stadiumit.
Eja edhe Ti!
Forca Vllaznia!
