Ish futbollisti i Vllaznisë, Ndriçim Shtubina duket se është lidhur ngushtë me Rrogozhinën. Fillimisht si futbollist, madje duke iu besuar edhe shiriti i kapitenit të skuadrës, dhe më pas edhe si drejtor sportiv i klubit Egnatia, shkodrani mori verësime mjaft pozitive.
I spikatur edhe si një person me vlera të mirëfillta qytetarie, mjaft punëtor dhe komunikues me kolegët, tifozët dhe emprorët, u ambientua aq shumë me Rrogozhinë, sa prej vitesh familja e tij është shpërngulur e tëra në këtë qytet. Madje, fëmijët e tij, krahas shkollimit, janë bërë pjesë e Akademisë së Futbollit Egnatia.
Ndërkohë, ditët e para të vitit të ri 2023 kanë filluar me lajme të reja për Shtubinën. Diskutimet, debatet, apo edhe ndonjë mosmarrëveshje brenda kampit rrogozhinas detyruan Shtubinën që të tërhiqet nga posti i drejtorit sportiv të Eganatias.
Vendim, të cilin ishte vetë Shtubina që e bëri publiku përmes një postimin në rrjetet sociale. Lëvizje kjo, të cilën Shtubina e argumentonte se po e bënte për të mirën e klubit, por edhe në respekt të Presidentit të klubit, Agim Demrozi, ndaj të cilit, ai thotë se falë marrëdhënieve shumë të mira që ka me të, i detyrohet shumë për mbështetjen e dhënë.
Dhe, ka qënë pikërisht ky i fundit, presidenti Demrozi, që me dëshirën për ta pasur sërishmi pranë Shtubinën i propozoi postin e trajnerit të Egnatias U-21. Vendimi në fjalë ka marrë formën e prerë duke zyrtarizuar Shtubinën në këtë post.
Vendin e lënë bosh nga largimi i Shtubinës te rrogozhinasit pritet ta marrë Edlir Tetova. Tekniku durrsak e njeh mjaft mirë ambientin e ekipit pasi ka i ka drejtuar në fillim të këtij sezoni. Tashmë 39-vjeçari do të ketë rolin e drejtorit sportiv në klub, ndërsa ky do të jetë një rikthim për të, ndërsa mungon zyrtarizimi për të dy protagonistët.
