Në vazhdën e takimeve që Akademia e Futbollit Vllaznia organizon me stafin e trajnerëve të saj për rritjen e anës profesionale, ishte edhe leksioni i hapur që kishte për temë: “Tranzicioni i të rinjve nga akademia tek ekipi i parë”.
I ftuar në këtë takim, i cili u mbajt në stadiumin “Loro Boriçi”, Shkodër, ishte edhe Fulvio Pea, Drejtor Teknik pranë FSHF-së, i cili ndër të tjera vlerësoi bashkëpunimin që Federata ka me Akademinë e Futbollit Vllaznia.
Ndërkohë, Drejtori Teknik i Federatës Shqiptare të Futbollit, Fulvio Pea, mbajti një leksion të hapur për të pranishmit, trajnerët e Akademisë Vllaznia si dhe ato të Klubit të Futbollit Femra Vllaznia.
Në këtë leksion ai prezantoi para trajnerëve të Akademisë së Futbollit Vllaznia, si dhe ato klubit të futbollit të femrave, procesin e tranzicionit të futbollistëve të rinj nga akademia tek ekipi i parë dhe punën që bën Federata e Futbollit për zhvillimin e të rinjve.
Pea, me një karrierë të gjatë si trajner dhe tashmë si Drejtor Teknik, ndau eksperiencën e tij në lidhje me metodologjinë e punës që aplikon një ekip me të rinjtë, vendosjen e objektivave, stafi teknik dhe detyrat përkatëse, filozofinë e lojës, përgatitjen teknike të ndeshjes, përgatitjen atletike të lojtarëve, rregullat e lojës dhe kodin etik.
Leksioni i hapur u fokusua edhe te puna që FSHF po bën me sektorin e të rinjve, duke zhvilluar turne te moshave të ndryshme, krijimin e “Elite Youth Development Academy” dhe mbikëqyrjen e vazhdueshme të talenteve të rinj brenda dhe jashtë vendit.
(Video) Pamje nga leksioni “Tranzicioni i të rinjve nga akademia tek ekipi i parë”, si dhe prononcimet e kordinatorit të AF Vllaznia, Ndriçim Shtubina si dhe Drejtorit Teknik të Federatës Shqiptare të Futbollit, Fulvio Pea.
