Vllaznia dhe Kamza basket përballen mbrëmjen e së shtunës në pallatin e sportit “Qazim Dervishi” të Shkodrës në kuadër të javës së katërt të Superligës së Basketbollit Meshkuj. Në tre ndeshjet e para, kuqeblutë kanë regjistruar humbje, përkatësisht me Teutën Tiranën dhe Besëlidhjen, por për hirë të së vertetes, përpos takimit të parë me durrsakët, në dy përballjet me bardheblutë dhe lezhjanët, niveli i lojës ka ardhur në rritje. Ndaj, në sfidën e së shtunës ndaj Kamza Basket, është moment që Vllaznia të realizojë fitoren e parë. Por, për ta bërë realitet një gjë të tillë, nga kampi kuqeblu vjen apeli në adresë të tifozërisë shkodrane për mbështetje në shkallët e pallatit të sportit “Qazim Dervishi” të Shkodrës.
“Këtë të shtunë në orën 18:00, Vllaznia përballet me Kamzën në kërkim të fitores së parë të sezonit! Na duhet çdo tifoz në pallatin e sportit për të na dhënë energjinë për ta arritur! Mbështetja juaj është ajo që na shtyn përpara, dhe së bashku mund të fillojmë rrugëtimin e fitoreve! Data: E shtunë, Ora: 18:00. Vendndodhja: Pallati i Sportit ‘Qazim Dervishi’
Le të mbushim sallën dhe të krijojmë një atmosferë të paharrueshme! Kuq e blu, deri në fund!”, shkruhet në postimin që Shoqata e Basketbollit Vllaznia ka publikuar në faqen zyrtare.
