Fusha me bar natyral në stadiumi “Luftëtari” në Gjirokastër është inauguruar sot me sukses. Para nisjes së ndeshjes AF Luftëtari – Delvina, u mbajt ceremonia e përurimit të fushës me bar natyral, një investim i përbashkët i Federatës së Futbollit dhe Bashkisë Gjirokastër.
Në këtë ceremoni morën pjesë Zv. Presidenti i FSHF-së, Arben Dervishaj, dhe Kryetari i Bashkisë Gjirokastër, Flamur Golemi.
Në fjalën e tij përshëndetëse, Zv. Presidenti i FSHF-së, Arben Dervishaj, tha se investimi në stadiumin e Gjirokastrës është një premtim i mbajtur nga Federata e Futbollit dhe Presidenti Armand Duka. Gjithashtu, ai shtoi se Federata e Futbollit në Gjirokastër do të ndërtojë edhe dy fusha të tjera stërvitore.
“Investimi në stadiumin e Gjirokastrës është një premtim i mbajtur nga Federata Shqiptare e Futbollit dhe Presidenti Duka. Më në fund, skuadra e Luftëtarit do të luajë ndeshjet në një fushë të cilësisë së lartë, njësoj si stadiumet elitare. Ndërkaq, investimet në këtë stadium do të vijojnë me rikonstruksionin e dhomave të zhveshjes dhe pajisjen me stola. Ky nuk është investimi i vetëm i FSHF-së në këtë qytet, pasi në bashkëpunim me Bashkinë e Gjirokastrës kemi projekte për të ndërtuar dy fusha të tjera stërvitore,” tha Zv. Presidenti i FSHF-së, Arben Dervishaj.
