Armando Broja është rikthyer në fushë, pas disa muajsh mungesë për shkak dëmtimi. Sulmuesi kuqezi u aktivizua me Everton në minutën e 79-të, duke i marrë vendin Betos, në ndeshjen ndaj West Ham.
Edhe pse nuk ishte ai që krijoi apo shënoi golin e barazimit, sidoqoftë, prania e shtatlartit prej 1.92 metrash në zonë I dha më shumë hapësirë mbrojtësit Xhejk O’Brajen.
Ishte minuta e parë shtesë dhe Evertoni shpëtoi nga disfata, edhe pse nga sfidat në “Gudison Park” kërkohet sidomos fitorja.
Për Brojën ishte një kthim I lumtur, ndërsa ishte I pamundur që nga 9 janar I këtij viti.
Sulmuesi kuqezi u dëmtua në duelin e Kupës së Anglisë ndaj Peterborout.
Vetëm një ditë para ndeshjes së Premier Ligës, 23-vjeçari u kthye më në fund në stërvitje të plotë me ekipin, ndërsa pak ditë më parë kishte bërë përgatitje të lehtë.
Natyrisht, do të duhet shumë kujdes me një lojtar që këtë edicion ka luajtur vetëm 250 minuta, dhe që ka humbur 71 ndeshje pak më shumë se dy vjet, duke bërë pushim plot 465 ditë nga 821, pra më shumë se gjysmën e kohës.
Trajneri I kombëtares, Silvinjo, e ka ftuar në përfaqësuese për dy ndeshjet ndaj Anglisë dhe Andorrës në eliminatoret e Kupës së Botës, ndërsa Broja ka luajtur për herë të fundit me fanelën kuqezi në 24 qershor të vitit të kaluar, në sfidën ndaj Spanjës në Euro 2024.