Kombëtarja shqiptare U-16 ka barazuar me rezultatin 2-2 ndaj Lituanisë në sfidën e parë të turneut ndërkombëtar “Vlatko Marković” në Kroaci. Në ndeshjen e zhvilluar në kompleksin e Dinamos së Zagrebit, kuqezinjtë e drejtuar nga Agron Kërçova bënë një paraqitje të mirë, por pa mundur dot të merrnin tre pikët.
Formacioni titullar i Shqipërisë U-16 në këtë takim ishte ky: Dervishi, Koleci, Selmani, Çela, Damini, Belloj, O’Boyle, Jaku, Myrta, Kashari, Bode.
Pjesë e kombëtares U-16 janë edhe dy futbollistët shkmodranë të Akademisë Vllaznia, mesfushori Xhoel Hajdari dhe mbrojtësi Egert Selmani. Ky i fundit është hedhur në fushën e lojës nga trajneri Kërçova që në minutën e parë, ndërkohë që mesfushori Hajdari u aktivizua në minutën e 54’ dhe deri në fund të ndeshjes. Sipas informacionit të marrë pranë stafit të kombëtares, dyshja kuqeblu e kombëtares kuqezi, Selmani-Hajdari kanë bërë një figurë shumë të mirë sportive duke kontribuar edhe në barazimin 2 me 2 ndaj Lituanisë.
Përfaqësuesja shqiptare e pa veten në disavantazh shumë shpejt, pasi Lituania shënoi golin e parë në minutën e 7-të me anë të Rybelis. Sikur të mos mjaftonte kjo, në minutën e 17-të, tekniku Kërçova bën një zëvendësim të detyruar duke nxjerrë nga loja O’Boyle, i cili shfaqi probleme fizike dhe hodhi në fushë Metajn.
Me kalimin e minutave djemtë kuqezi e morën veten, duke krijuar volum loje dhe raste për shënim. Si rrjedhojë gjetën edhe golin e barazimit në minutën e 32-të, kur Myrta finalizon me sukses brenda zonës një aksion me kombinime mjaft të bukura. Pjesa e parë mbyllet me rezultatin e barabartë 1-1 dhe vetëm pak minuta pas nisjes së pjesë së dytë, Shqipëria e sheh veten sërish në disavantazh, pasi Lituania shënon golin e dytë me anë të Osipovič (52’).
Trajneri kuqezi bën disa zëvendësime duke hedhur në fushë fillimisht Kurtin (54’) dhe shkodranin e Akademisë Vllaznia, Xhoel Hajdari (54’) dhe më pas Qoshkun (63’), Isufin (63’) dhe Meçen (63’). Pas një këmbëngulje të gjatë, 16-vjeçarët gjejnë golin e barazimit në minutën e 80-të me autor Metajn. Në minutat e fundit rezultati nuk ndryshon dhe sfida e parë mbyllet me rezultatin 2-2.
Shqipëria është shortuar në Grupin B bashkë me Rusinë, Bosnjë & Hercegovinën dhe Lituaninë. Në ndeshjen tjetër të grupit të luajtur sot, Rusia mundi me rezultatin 3-0 Bosnjë & Hercegovinën
Ditën e enjte, më 6 maj, Shqipëria U-16 do të sfidojë pikërisht Rusinë me duelin që nis në ora 15:45. Takimi i tretë dhe i fundit për Shqipërinë në grup do të luhet më datë 7 maj ndaj Bosnje & Hercegovinës në ora 10:30.
Lituani – Shqipëri 2-2
Golat: Rybelis 7’, Osipovič 52’ / Myrta 32’, Metaj 80’
Shqipëria U-16: Dervishi, Koleci, Selmani, Çela, Damini (Kurti 54’), Belloj (Meçe 63’), O’Boyle (Metaj 17’), Jaku (Qoshku 63’), Myrta, Kashari (Isufi 63’), Bode (Hajdari 54’).
Trajner: Agron Kërçova
